Буьгуьн, 23-нши сентябрьде, Ногай районында халкымыздынъ айтылган дав баьтири, Уллы Аталык согысынынъ белсенли катнасувшысы, аьскершилик «Данък» орденининъ уьш те дережесининъ толы иеси Алимхан Боранбай увылы Асанов тувганлы 100 йыллыгы байрам кебинде белгиленеди.

Соны ман байланыста район орталыгы Терекли-Мектеб авылдынъ Баьтирлер аллеясындагы А.Асановтынъ бюстине эм А.Асанов атындагы орамдагы мемориаллык тактага шешекейлер байламлары салынады. Баьтирдинъ тувган юрты Нариман авылында, бу оьрметли мерекеге сый этилинип, авылдынъ Данък эстелигине де шешекейлер байламлары салынып, митинг, «Юрек эстелиги» деген адабиат-музыкалык композиция, «Эстеликти тирилер саклайды» деп аталган концерт программасы, йыл сайынлык эстеликли волейбол турнири оьткериледи.
Сол куьн атаклы ердесимиздинъ сыйына баьри де район билимлендируьв организацияларында «А.Асанов – согыс баьтири», А.Асанов атындагы Нариман авыл орта мектебинде конференция, «Халкымыздынъ данъклы увылы» деген концерт программасы болып оьтеек. Соны ман бирге район мектеблеринде, авыл маданият уьйлеринде, ра- йон ортакластырылган китапханасында сентябрь айында эм йыл узагында йигит ердесимиздинъ согыс йолына багысланган туьрли шаралар уйгынланып озгарылмага каралады.