Ногай районынынъ Терекли-Мектеб авылындагы «Юлдыз» балалар бавында заман-заманы ман коркынышсыз йол-юрис бойынша яйылдырув иси юритилип келеди. Мектебке дейим билимлендируьв ошакларында йол-юрис йорыкларына багысланган шаралар йыйы озгарыладылар. Балаларымызга орамлар, йоллар кавыфсыз болсын деп, биз не зат этпеге керекпиз? Элбетте, биз оларды йол-юрис йорыклары, йол белгилери эм сондай баска затлары ман туьрли шараларды озгарувымыз бан таныстырып келемиз. Сол мырат пан «Юлдыз» балалар бавында казан айы ишинде йол-юрис йорыклары деген темага багысланган юмалыгы уйгынланып оьтти. Балалар бавынынъ тербиялавшылары У.Акбиева, А.Максутова, С.Алыпкачева кызыклы болган туьрли ойынлар, дерислер, кенъеслер кебинде шаралар озгардылар. «Биз йолды оьтемиз», «Балалар йол белгилери мен танысадылар» деген проектлерин яшавга шыгардылар. Юмалык бойынша балалар бавында физкультура бойынша инструкторы Русала Агисова ман йол-юрис йорыкларын уьйренуьв бойынша «Веселый светофор» деген спорт шарасын аьзирлеп озгарды. Саьбийлерге оьзлерин йолда кайтип юритпеге керек йорыкларын эсине туьсируьвде ярдамласув мырат пан конакка Светофор Светофорович те келген эди. Балалар ойынлар, эстафета, ярыслар кебинде йол-юрис йорыклары, йол белгилери акында билимлерин беркиттилер, оьзлерин пассажир, коьлик айдавшы, яяв юруьвши орынында сезбеге амал таптылар. Шарадынъ тамамында коьликлердинъ базласувлары, «Йол белгиси» деген анъ флешмобы уйгынланып оьттилер.
«Юлдыз» балалар бавынынъ ис коллективи тербияланувшылардынъ ата-аналары ман тар байланыс тутып келеди. Олар ата-аналардынъ катнасувы ман йыйынлар, йол-юрис йорыклары бойынша саьбийлердинъ ясаган ислери, суьвретлери коьрсетилген выставкалар озгарадылар. Йол-юрис службасынынъ инспекторы, полициядынъ капитаны Э.Картакаев йол-юрис йорыклары ман саьбийлерди таныстырув бойынша шараларында, сол темага кенъеслер озгарувда балалар бавынынъ йыйы конагы болып келеди. Полиция куллыкшысына саьбийлердинъ йол-юрис йорыклары бойынша билимлерин оьстируьвде белсенли аьрекети уьшин уьйкен разылыгымызды билдиремиз.
А.Межитова.
Суьвретте: йол-юрис службасынынъ инспекторы, полициядынъ капитаны Э.Картакаев «Юлдыз» балалар бавында оьткен шарада.