Яй айлары йылысып барады, тек янъыларда элимиздинъ мектеблерин тамамлаган ясларымыз, кызларымыз тезден йогары окув ошакларынынъ эсиклерин ашпага аьзирлик коьредилер. Сол яслардынъ бириси – Зарина Рашид кызы Юнусова.
Юнусовлардынъ аьели алыс Сургут каласына Кизляр районынынъ Боранбай авылыннан коьп йыллар артта коьшип келген. Аьел басы Рашид – коьлик айдавшы, Мархаба медицина тармагында аьрекетин етимисли юритип, элине оьз пайдасын тийдирип келедилер. Зарина Сургут каласында тувган, онда балалар бавына юрип, 45-нши номерли орта мектебинде билим алган. Оьз тенълерининъ арасында ногай кыз шалыскырлыгы, окымыслыгы, билимге уьйкен ымтылысы ман баскаланып, окув дерислерин де тек «бес» белгилерине окып келди. Мектебтеги окувында коьрсеткен бийик етимислери уьшин Зарина Юнусова 5- нши класстан алып губернатор атындагы стипендиясына тийисли болып келди. Окув йыллары ишинде кыз кала мектебининъ яшавында белсенли катнасты. Ол туьрли дерислер бойынша оьтетаган олимпиадаларда, кала, округ, Россия бойынша ярысларында катнасып, баргылы орынларга тийисли болып, коьплеген Сый грамоталарынынъ, баргыларынынъ иеси болып келген.
Янъыларда Зарина, Патшалык сынавларын да йогары коьрсетимлерине берип, алтын медалин байырлады. Солай болып, каладынъ Билимлендируьв департаменти, мектеб администрациясы атыннан кыздынъ коьрсеткен уьстинликлери, алган ийги тербиясы, эдаплыгы, шалыскырлыгы белгиленип, кыздынъ ата-анасына каратылган разылык хаты да тапшырылды. Сол тувыл ма ата-ана уьшин уьйкен наьсип, куьез?
Заринадынъ етимисине, боьтен де, онынъ энеси Кабират Казтувган кызы Менлиалиева суьйинди, коь- нъили коькке дейим коьтерилди.
– Кайдай уьйкен суьйиниш, кайдай оьктемлик тувдырды юрегимде бу йылы хабар, суьйинишим коькирегиме сыймайды. Алыс Сургут каласыннан Зарина-йиеним мага телефон ман: «Мен сизге эм Марина-абама усаганман! Мектебти алтын медалине тамамладым», – деди куванышы ман боьлисип.
Белгилев керек, Марина-абасы Карашай каласындагы педагогикалык университетти кызыл дипломга тамамлаганы, буьгуьнлерде етимисли филологы болувы, абасынынъ билимлиги, куллыксуьерлиги эм энеси Кабират Казтувган кызынынъ суьйикли кесписине алаллыгы, бай сулыплы окытувшы болганы Заринага аьр заманда да ийги коьрим, уьлги болып келген.
– Дуныяда энъ де уьйкен куьез – ол балаларым, балаларымнынъ аьвлетлери, балады эл мактаса, оннан артык не бар, – дейди хабарлавымызда ясуьйкен кыскаяклы, нур толган коьзлери мен йылы куьлемсиреп.
Заринадынъ келеекте йогары окув ошагына туьспеге уьйкен мырады бар. Сол мырады яшавга айланып, суьйген кесписининъ иеси болып, ногай халкынынъ атын, данъкын шыгараягына сеним этемиз.
Йолынъ ашык болсын, Зарина!
Г.Нурдинова.
Суьвретте: Зарина Юнусова.
