«Шоьл тавысы» газетасынынъ хабаршылары Ногай районынынъ яшавшыларына: «Коронавирус яйылув маразыннан вакцинацияды оьтпеге суьесиз бе?» деген соравын бергенлер. Олардынъ коьбиси прививка эткенлери акында билдиргенлер. Соьйтип, Ногай районынынъ Терекли-Мектеб авылынынъ яшавшысы, Ногай патшалык драма театрынынъ режиссер ярдамшысы Еллетхан Кадырбердиевна Аблезова да вакцинация оьткенин билдирди эм Ногай районынынъ яшавшыларына да оьзлерин эм кардаш-тувганларын кавыфсызландырув мыратта вакцинация этпеге шакырады.

– Аявлы меним ердеслерим!
Буьгуьнлерде биз енъил болмаган заманларда яшаймыз. Коронавируслы яйылув маразы мине 2 йыл бойы бизим савлайымызды да коркынышта ыслап, бизим яшав-турмысымызды кыйын аьллерине аькелди. Вирус артка таймайды, коркынышлы душпан ман каты куьрес юритиледи. Биз оьз кардаш-тувганларымызды йоямыз. Коронавирус тек авырыганларга тувыл, ол тоьгеректегилерге де, айтпага, бизим аталарымыз, тетелеримиз, аьвлетлеримиз, уныкларымыз уьшин де бек кавыфлы. Буьгуьнлерде сол юкпалы авырувга карсы болган пайдалы амалы – ол вакцинация болады.
Власть те, врачлар да, Россия гражданлары – биз де соннан баска йолды, пайдалы амалды коьрмеймиз.
Биз савлайымыз да ювыкларымыз, досларымыз бан коркпай аьллесип, тувган куьнлерде, концертлерде, театр коьрсетуьвлеринде катнасып, аьдеттеги яшавына кайтпага суьемиз. Тек вакцинация бизге коркпай яшамага ярдамласаяк.
Ногай патшалык драма театрынынъ ис коллективи оьзинъиздинъ эм кардаш-тувганларынынъ ден савлыгы акында ойлап, вакцинация оьтпеге шакырады, – дейди Еллетхан Аблезова.