Быйыл, 21-нши апрельде, Ногай район Депутатлар йыйынынынъ кезекли сессиясы болып оьтти. Сонынъ исинде район аькимбасы Мухтарбий Аджеков, авыл поселение аькимбаслары, депутатлар, район организация етекшилери, солай ок ямагат организациялар эм СМИ ваькиллери катнастылар.
Сол сессияда ойласувга шыгарылган соравлардынъ арасында район администрациясы алдындагы Кадрия атындагы янъы парк ишиннен кофейня уьшин коммерциялык меканы курылысына деп 200 квадрат метр ер участогын беруьв соравы да бар эди. Бу сорав бойынша ойласувда туьрли ойлар айтылганнан себеп (бир неше депутатлар, ямагат ваькиллери соны макул коьрмедилер), соны эндиги сессияга ойласувга калдырдылар. Сондай сорав ойласылып басланганша, район етекшиси Мухтарбий Аджеков оьзининъ эсап-беруьв докладыннан сонъ Махачкалага кеткен эди.
Сессияда ортакшылык эткен «Шоьл тавысы» республикалык газетасынынъ бас редакторы Эльмира Кожаева сессиядан сонъ, Кадрия атындагы паркта коммерция меканлары уьшин орын болмага керек тувыл деп билдирди.
– Былтыр, Россия куьни алдында, Кадрия атындагы янъы паркы шатлыклы кепте ашылды. Бу парк «Дагестан Республикасында 2019-2024-нши йылларда аьлиги заманга келисли кала аьллерин кеплендируьв» деген Дагестан Республикасынынъ патшалык программасы бойынша курылды. Сонынъ ашылувы район яшавынынъ тарихке кирген оьзгериси болып оьтти.
Айырым кепте белгилемеге суьемен, РФ Госдумасынынъ депутаты, «Трезвая Россия» Савлайроссиялык козгалысынынъ етекшиси Султан Хамзаевтинъ аьрекети мен паркта яслар уьшин воркаут, солай ок онынъ аркасы ман балалар майданлары курылып кулланувга берилген.
2021-нши йыл язда Дагестан Аькимбасы Сергей Меликов та Ногай районына ис йорыгы ман келуьвинде бу паркка да кирип, яс тереклер олтыртты. Тек янъыларда ДР Халк Йыйынынынъ депутаты Гасан Османов эм Дагестан Патшалык турак уьй инспекция етекшиси Сергей Касьянов район администрация куллыкшылары ман Кадрия паркында тереклер олтыртып кеттилер.
Бирден, район Депутатлар йыйынынынъ ызгы сессиясынынъ тамамында бу парк ишиннен коммерциялык курылыс уьшин 200 квадрат метр ер участогын беруьв акында сорав коьтерилип турмас па?! Мен сондай соравды аьдем намысына келиссиз эм керексиз сорав деп санайман!
Келинъиз, эсимизге алайык, кайтип 1984-нши йылда Дагестан Халк поэти Расул Гамзатов Терекли-Мектеб авылына келгенде, район культура уьйининъ сол ягында Кадрия атындагы аллеяды шатлыклы кепте ашканын. Тек соннан бир неше йыллар оьтип, сол ерде банкет залы курылды…
Буьгуьнлерде, оькинишке, тап сондай ис тагы да болаяк болып туры. Басында, элбетте, проектте кофейня болаяк деп язылады, сонъында банкет залы курылып басланады, неге десе берилеек 200 квадрат метр ер кесегинде сондай мекан курмага амал бар.
Аьли заман бизде калай, Кадрия эндиги тири тувыл эм ол оьзининъ аты ман аталган паркты коршалап болмайды, соьйтип ол 80-нши йылларда онынъ аты ман ашылган Аллеяды да коршалап болмады… Сол себептен онынъ паркыннан кесек ерди сермеп алув ниети мен буьгуьнлерде сессияга бу соравды шыгарып турган халкымыздынъ ваькиллерине буршав эткендей бир зат та йок.
Баьрининъ де эсине салмага суьемен, Турцияда – Ялова эм Адана калаларда Кадрия атындагы парклар ашылганлар эм соларда коммерциялык меканлар курмага деген ой биревдинъ басына да кирип шыкпайды.
Болса да мен бизим район депутатлары соны койдырарлар деп олардынъ намысына сенемен, солай ок район ямагатынынъ эсин мундай келиссиз, бизим ногай халкымызга тийиссиз фактка каратпага шакыраман, – деди тынышсызланган ян авырувы ман Эльмира Кожаева.
Бизим хабаршы.
