«Тек енъуьвге! Тек бийикликке! – бу соьзлерди, коьбисинше спортсменлер арасында эситпеге болады шакырув эсабында, неге десе олардынъ яшавы, каьри – енъуьв- лерге ымтылув.

Соьйтип, спорттынъ волейбол, киши футбол кеплери мен кызыксынып, бийик етимислерге етискен спортсмен йигитимиз – ЧР Шелков районынынъ Каршыга авылыннан окытувшы эм тренер Алимхан Сатыров. Мунда ол, янынынъ оты ман, оьз усталыгы эм кайратлыгы ман, арымай-талмай куьнле-куьнлик аьрекетлеп, басшылык этетаган спортсменлер командасын (суьвретте) тек бийик етимислер казанувга онълап, туьрли спорт ярысларда баргылы орынларды бийлеп, Каршыга авылынынъ ийги атын айттырып келеди. Бу айтувымнынъ акыйкатлыгын туьрли йылларда озгарылган спорт ярыслары шайытлайдылар. Айтпага, бу язда, 9-ншы июньде Шелковскойда, 8 командалар ортакшылап, волейбол бойынша озгарылган турнирде Каршыга авыл командасы 1-2-нши орынларды байырлап кайттылар. Муннан алдынгы йылларда, Грозный каласында волейбол бойынша мектеб Лига ярысында 5-нши турдан сонъ, Каршыга авылы – 1-нши орынды, сол ок калада волейбол бойынша ЧР Бириншилигинде баргылы 3-нши орынды бийлеген.
Мине сондай волейболистлер командасы бар Каршыга авылында. Каршыга (орысшага коьширгенде) – «ястреб» канатын кенъ яйып ушатаган куьшли кус. Авыл аты да спортсменлерге келислидей деп ойлайман, неге десе олардынъ спорт пан каьрлевинде етисетаган бийик етимислери олардынъ куьшли касиетликлерин белгилейди.
Алла-Таала куватлык берсин Каршыга авылынынъ спортсменлер командасына эм олардынъ тренери Алимхан Сатыровка. А биз оьктемсип турайык сондай ердеслеримиз бен.
Я.Дильманбетова.