Карашай-Шеркеш еринде мине 20 йылдан бери балалар уьшин, «Маьметекей» деп аталып, республикалык адабиат-суьвретлев журналы шыгарылады. Онынъ бетлеринде Элимиздинъ ногай халкы яшайтаган туьрли ерлериннен, билим алувда алды сырада болып, туьрли окув сабаклары ман кызыксынган балалар акында макалалар орын табадылар. Журнал бизим Дагестан еринде де белгили эм сый-оьрмет пен пайдаланады. Бизим «Лашын» балалар журналы Кобан еринде шыгарылатаган бу балалар журналы ман тар байланыс тутады. Онда биз «Маьметекей» журналынынъ авторлары» деген рубрика астында коьп кызыклы макалалар ерлестиремиз эм аьли де ерлестиреекпиз. Бизим балалар акында язган макалаларымыз да «Маьметекей» журналында тез-тез баспаланады.
Биз «Маьметекей» балалар журналынынъ коллективин сыйлы мереке мен ак юректен кутлаймыз, армаганда да бийик уьстинликлер сагынамыз. Огырлы йолга, сыйлы «Маьметекей» деп айтпага суьемиз.
С.Култаева,
«Лашын» журналынынъ редакторы.