Кишкей саьбийлер – яшав куьези, ямагатымыздынъ келеектегиси. Олар акында каьр шегуьв, оларга булытсыз, завыклы балалык шагын савкатлав, онъайлы яшав туьзуьв, билим алув сокпагы ман алып барып, тоьгеректеги мен кызыксындырып, табиат пан берилген зейинлигин арттырувга аьллер туьзуьв – бизим колымызда. Кайдай да болсын, талабы йок бала болмайды, тек бизге, сол яктан балага эс каратып, онынъ оьз-оьзине ынанымын якламага, ийги баславларын яшавга шыгармага ярдамын тийгистпеге керек болады.
Сол акта уьйкен куллык юритедилер балалар уьшин шыгарылатаган «Лашын» (Дагестан еринде) эм «Маьметекей» (Карашай-Шеркеш Республикасында) адабиат-суьвретлев журналлары.

Бу куьнлерде «Маьметекей» балалар журналы дуныя юзине шыгарылганлы 20 йыллык мерекесин белгилейди. Онда куллык этетаган журналистлер бизим ногай кызларымыздынъ эм кеделеримиздинъ окув аьрекетинде етискен уьстинликлери, туьрли оьнерлерин коьрсетуьвде казанган бийик етимислери акында юрек йылувлыгы ман, ян туьбиндеги сезимлерине таянув ман, журналистика жанрларына усташа негизленип язадылар. Сондай макалалар баска балаларга ийги коьрим болады, олардынъ менлигин коьтереди, оьз-оьзине сенимлигин арттырады.
Биз ногай тилинде балалар уьшин шыгарылатаган «Маьметекей» журналынынъ куллыкшылар коллективин онынъ биринши номери дуныя юзине шыгарылганлы 20 йыл толганы ман ак юректен кутлаймыз, мундагы баьри журналистлерге яратувшылык исинде уьстинликлер йораймыз, журнал иштелиги балаларды суьйинтип турганды сагынамыз.