Ногай халкы домбыра ясав устасы, бурынъгы йыравлардынъ асарларын саклавшысы эм таралтувшысы, йырлавшы, музыкант, окытувшы, шаир эм тувралап айтканда, оьзининъ зейинли аьдемлерининъ бириси Алибий Романовты йойганы бир йыл да кетип калды.
Тек Ногай районымызда тувыл, савлай туьрк тиллеринде соьйлейтаган халкларга Алибий Романовтынъ аты таныс эм белгили эди. Онынъ йырлайтаган йырлары ша аьр бир тири янды уянтатаган эди. Оьзек те, онынъ данъкы эл арасында миллетимиз миллет болып яшаган шаклы яшаяк, ама ер юзинде оьзи юрген болса, халкынынъ маданиятына аьли де коьп косым этеек эди. Энди болса, калдырган асабалыгын сакламага керек болады.

Уллы талап, оьз усталыгын оьстируьв уьстинде куллык этуьв Алибий Кубий увылына йогары кеспи сырагыларына етиспеге амал берген. Энъ де бириншилей, ол бурынъгы эпикалык йырлардынъ, дестанлардынъ йыравы эди, Алибий Романов йыр яратувшылыгы, анъ эм окытувшылык аьрекети мен халк сыйын, абырайын казанган аьдем эди.
Ердесимиз «Дагестан Республикасынынъ ат казанган артисти» деген атка тийисли болган, «Алтын домбыра» Гран-При иеси болган. Тек Россия элинде тувыл, Алибий Романов Казахстан, Туркия эллеринде коьплеген халклар ара фестивальлерде эм конкурсларда катнаскан. Баьри яктан да уста инсан, Алибий Романов бизим халк саз алаты – домбырады ясав усталыгын уьйренген эм оны ясавда йогары уьстинликке етискен инсан эди. Бу куьнлерде онынъ колы ман яны салынып ясалган саз алатлар коьплердинъ колларында оьз пайдасын бередилер.
Алибий Кубий увылы Куьнбатар авылында балалар ансамблин туьзген эм домбырада ойнап уьйрететаган эди. Ол балалар ман баьри билимин, янын берип ислейтаган эди эм онынъ домбырашылары тек Ногай районында тувыл, онынъ кырында да белгили. Уллы йырлавшымыздынъ домбырасынынъ сеси сондай да таза эди, ол баьри халкты сукландырган.
Алибий Кубий увылынынъ яшав эм яратувшылык йолы инсаннынъ оьз халкына куллык этуьвдинъ коьрими болады. Сондай усталардынъ аркасы ман халкымыздынъ анъ маданияты танылады, мутылып калган аьдетлер янъыртылады. Алибий Романовтынъ халк яратувшылыгына, анъ саниятына, келеяткан несилди тербиялавына салган уьлисин биз баалаймыз эм аьр заман эсимизде саклаякпыз. Онынъ халкына калдырган анъ байлыгы, туьрли технологиялар аркалы язылып калынган сеси бизге энди энъ де уьйкен баалык болады. Алибий Романовтай аьдемлер миллетке оьмирде бир кере бериледилер эм олардынъ атлары оьмирлерге каладылар.
Алибий Кубий увылынынъ аты калды халкына!
Г.Курганова.
Суьвретте: А.Романов.