Оьткен оьмирдинъ 70-90-ншы йылларында тувган эр кисилердинъ коьбисининъ бактылары бизим Ногай районымызда милиция, буьгуьнлерде полиция тармагы ман тар байланыслы болып келди. Олай дегенимиз, биз йогарыда келтирген кезек ишинде дуныя юзине энген эр йигитлеримиз кеспи сайлавга шак еткенде, сол заманларда «модный» кеспилердинъ бириси – милиция куллыкшысынынъ кесписин сайлаганлар. Сол санда меним макаламнынъ бас келпети Темирхан Рашитханович Сагиндиков та бар эди.

Ис аьрекетин йырма йылдан артык заман полиция тармагында бардыра келип, Темирхан оьз исининъ авырлыгын эм яваплылыгын бек аьруьв анълайды. Ол, аьскер сырасында оьзининъ эр борышын намыслы толтырып келгеннен сонъ, ис аьрекетин Ногай районымыздынъ милиция боьлигинде бардырмага токтаскан. Баслап ол патруль-пост службасынынъ куллыкшысы болып доьрт йыл узагында бардырды, оннан сонъ сол шаклы йыллар узагында милициядынъ СОГ боьлигинде иследи. Сол йыллар, меним ойыма коьре, энъ де авыр йыллар болган болса ярайды, неге десе мага да ис борышларыма коьре, олардынъ ис аьрекети акында халкымызга билдируьв-лер этпеге туьскен эди. Олар оьз яшав оьмирлерин аямай, отлы япсарларда ис борышларын толтырганын да коьргенмен, район орталыгымызда оьткерилетаган шатлыклы шараларда да оьзлерининъ коьрсетуьвлерин этетаган эдилер.

Буьгуьнлерде Темирхан, ийги ис аьрекетин бардыратаган куллыкшылар санында болып, баьри билимин районымыздынъ тынышлыгын саклар ниет пен кулланып келеди.
2005-нши йылдан алып Темирхан Рашитхан увылы Сагиндиков Ногай районы бойынша Россия ОМВД-дынъ ИВС боьлигинде ислеп келеди. Куллык тынышлардан тувыл. Тийисли йорыкларды тутпай, уголовлык яваплыкка тартылып, тутнакка капалатаган аьдемлерди каравылламага туьседи, оларды шакыртылган заманына судка еткеруьв – Темирхан ислейтаган боьликтинъ куллыкшыларынынъ тувра борышы. Ол буьгуьнлерде ИВС етекшиси Мурзабий Абдулманап увылы Шавгараевтинъ етекшилеви астында ис аьрекетин бардырады. Ол оьзининъ кол астында ислейтаган йолдаслары акында тек ийги соьзлер айтады.

– Темирхан Рашитхан увылы – оьз исине бек яваплы карайтаган куллыкшы, кайсы исти де шандазлык пан, аьдиллик пен толтыратаган йигит болады. Мен Темирхан ман ис аьрекетимди бардырганым коьп болмаса да, онынъ оьз исин бек суьйип бардыратаганы коьринеди. Сонынъ уьшин де болар ол ийгилер санында, – дейди Мурзабий Шавгараев.
Темирханнынъ иси бойынша яваплылыкты тутувы акында онынъ коьплеген Сый грамоталары, разылыклары, Дагестан Республикасынынъ Иш ислер министерствосыннан алган разылык хаты айтады. Ол эки кере «За отличную службу» деген коькирек белгиси мен де савгаланган.

Темирхан Сагиндиков ис аьрекети бойынша кайтип ийги деп белгиленген болса, соьйтип ийги уьй иеси де болады. Ол кайсы ерде де яваплыкты сезип юреди. Мен оны ман хабарласа келип, ол аьели алдында да яваплы экенин сезбей болмадым. Элбетте, балаларынъ болганнан сонъ, оларды да тийислисинше тербиялав – бизим киели борышымыз. Темирхан хатыны Лейла Делибий кызы ман (ол окытувшы исин бардырады) эки увылды тербиялайдылар. Атасынынъ кайтип исин бардырганын коьретаган уьйкен увылы келеекте полиция куллыкшысы болмага ниети бар. Тек алдыда йоллар да, йыллар да коьп. Кеспи байрамы алдында мен Темирхан Сагиндиковка ден савлыкты, аьли де коьп уьстинликлерди йорайман.

Г.Курганова.
Суьвретте: Т.Сагиндиков ис орынында.