Коьп йол-юрис йорыклардынъ бузылувынынъ бас себеби – автокоьликлердинъ сиселерининъ каранъалыгы. Олай дегенимиз, коьп автокоьликлердинъ терезелери каранъа этетаган кагытлар ман капланган боладылар, сол себептен автокоьлик айдавшы оьзининъ олтыратаган ериннен йолды ийги этип коьрмей калмага да болады. Боьтен де, автокоьликтинъ терезесининъ каранъалыгы кешки вакытта йолавшыга да, автокоьлик айдавшыга да кавыфлык тувдырады.

Россия Федерациясынынъ Административли ыхтыяр йорыклар Кодексининъ 12.5 статьясынынъ 1-нши статьясынынъ 3-нши кесегине коьре, эгер сиз айдайтаган автокоьлигинъиздинъ терезелери капланып, ярык келуьви 70 процентке тоьменленетаган болса, Россия Федерациясынынъ Оькиметининъ 720-ншы номерли (2009-ншы йылдынъ кырк кийик айынынъ 10-ншы куьнинде кабыл этилинген) токтасына коьре, автокоьлик айдавшыга 500 маьнет штраф салынады, эгер сол ыхтыярды тагы да бузса, ол тутнакка капалады.
Терезелери капланган автокоьликтинъ иесине, сол еринде терезелерин каплайтаган кагытларын тайдырмаса, ДПС инспекторы протокол салады эм он куьн узагында сол тийиссизликти тайдырмага заман бериледи, ол сол заман ишинде автокоьлигин тийисли аьлге аькелип, Ногай районы бойынша ОМВД ГИБДД- сына келип, каплавшы кагытларын тайдырганын коьрсетпеге керек болады, эгер ол сол белгиленген заманга эм ерге келмесе, сизинъ коьлигинъиз йол-юрис кавыфсызлыгынынъ талаплавларына келиспейди деп токтастырылады эм сиз йолда юрмеге болатаган ыхтыярды йоясыз. Сол талаплавларга бойсынмасанъыз РФ КоАП 19.3 статьясынынъ 1 кесегине коьре сизге 500 маьнеттен 1000 маьнетке дейим штраф яде 15 суткага тутнакка капалув каралады.
Ногай районы бойынша Россия ОМВД-сы 2021-нши йылдынъ коькек айынынъ 19-28-нши куьнлеринде «Тонировка» деп аталган оперативли-профилактикалык шарасын озгарды. Бу шарадынъ бас ниети – терезелери капланган автокоьликлерин аянлав эм тийиссизликтинъ алдын шалув эди.
А.Шангереев,
Ногай районы бойынша Россия ОМВД ОГИБДД начальниги полиция капитаны.