Терроризмнинъ кенъ яйылувы да бир политика. Аьдемлер терроризм аркалы ямагатты коркытып, физический корлавга калдырадылар. Терроризмге карсы турувда савлай ямагат биргелеспеге керек. Солай ок, олар ыхтыяр саклавшы органларынынъ терроризмге карсы этилетаган куллыкларын анълап, колтыклав этпеге кереклер. Бизим аьр биримиз терроризмге карсы турув йорыкларды билип, байыр эм ямагат кавыфсызлыкты сакламага борышлы. Биз балаларымызды да сол затлар ман яслай таныстырмага керекпиз, эгер террористлик акт болатаган болса, ол оьзин кайтип юритуьвди билсе, пайдалы.

Ама балаларды кайтип уьйретсек те, олар кимге де сенедилер, ким мен де тез катнасып кетедилер. Биз оларды яман затлар айтып, коркытып турмага керек тувылмыз, тек таныс болмаган аьдемлерге сенмеге ярамайтаганын анълатув тийисли. Солай ок, таныс болмаган аьдемлерден савгалар да алмага ярамайтаганын билсинлер.
Уьйкен аьдемлерге де, таныс болмаганлардынъ колларыннан бир затлар алып, баскага бермеге тилек салсалар, этпеге ярамайды, неге десе сиз сол берген заттынъ (дорба болсын, хат болсын) ишинде не барын билмейсиз. Сонынъ ишинде наркотикли алат яде куьшли, рецептсиз сатылмайтаган дарман болмага болады.
Бизим бас борышымыз – балаларымыздынъ кавыфсызлыгын саклав. Оларга террористлер акында анълатув хабарларды айтып, балаларынъыздынъ берген аьр бир соравына, оларга анъламлы кепте айтпага керек. Эгер бала ерде бек ыспайы ойыншык, телефон яде оравлы бир зат коьрген болса, сол затты алмага ярамайтаганын да айтпага тийислимиз.
Аьр бир аьдем мен, меним ювыкларым сондай абытка бармас деп ойласа да, сол затлардан бирев де сакланып болмайды. Сога коьре, кайсы ерде де саклык тутпага керек болады. Таныс болмаган аьдемлерге оьзинъиздинъ телефонынъызды берменъиз, сиз ол аьдем кимге тел согаягын билмейсиз.
Биз авыл еринде яшаймыз, коьп аьдемлер бир-бирисин аьруьв таныйдылар, сол яктан бизге бираз енъил, ят аьдем тез билинеди. Кала яшавшыларына бираз кыйын, калага кететаган балаларынъызга саклыкты тутпага маслагатларынъызды беринъиз.
Кишкей балалар ата-анасынынъ ким экенлерин билмеге кереклер, эгер бала соьйлеп болмайтаган болса, онынъ кисесине оьзинъиздинъ телефон номерлеринъизди язып салып койынъыз. Сондай аьллерге калган заманлар да болган, кишкей бала уьйиннен армаганга ялгыз оьзи кетип, адаскан ерлер де.
Саклык тутув – аьр бир аьдемнинъ кавыфсызлыгы.
К.Акмурзаева,
Ногай районы бойынша Россия ОМВД ПДН эм ОУУП ПДН тамада инспекторы полиция майоры.