Яшав оьмирининъ 93-нши йылында тайды арамыздан Дагестан Республикасынынъ Оькимет Советининъ сыйлы председатели Магомедали Магомедович Магомедов. Бу авыр кайгы ман байланыста Дагестаннынъ муниципалитетлерине эм республикалык коьлемлик информация амалларына каты кайгырувлар ман телеграммалар туьсип турады. «Единая Россия» ВПП Ногай ерли боьлигининъ толтырувшы секретари, РФ Орыс географиялык ямагатынынъ Ногай боьлигининъ секретари Амирхан Межитов «Шоьл тавысы» республикалык газетасына йиберген оьз телеграммасында белгилегенлей, Магомедали Магомедов яркын иштеликли яшав ман яшаган эм россиянлылардынъ эслеринде уллы патриот эм уьстинликли политик болып сакланаяк.
– Ога, СССР бузылып, «суверенитетлер парады» сокпагында Россия Федерациясынынъ субъектлерин «миллет квартиралары» бойынша боьлип алмага шалыскан йылларда басшыламага туьсти.
1999-ншы йылда дагестанлылар оьз басшысы Магомедали Магомедовтынъ етекшилиги астында Россиядынъ боьлинмеслигин саклаганлар. Сол заманнан алып, Россия Федерациясынынъ оьрленуьви басланды деп айтпага болады.
Магомедали Магомедов оьзин сулыплы политик эм зейинли уйгынлавшы этип коьрсетти. Аьлиги Дагестаннынъ кепленуьвинде оькиметлик дережеде етекшилевдинъ коллективлик органы эсабында Оькимет Совети киритилгени оькиметлик курылыс тармагында янъылык деп санамага болады.
Магомедали Магомедов Дагестан Республикасынынъ Оькимет Советининъ председатели болып аьрекет этуьвинде оьзининъ етекшилеп болув оьнерин толысынша яшавга шыгарып бажарды. Баьри затты тешкеруьвли шегип карап болувы, оькимет аьрекетшисининъ сулыплыгы эм акыллыгы ога, коьп миллетли халкты алдыга карап оьрленуьв йолы ман алып бармага, миллетлер ара кавгаласувлардан бас акашпага эп берди.
Оьз басшысынынъ етекшилеви астында дагестанлылар тынышлык суьювши Ислам динининъ сый-оьрметин кемситпеге бермедилер эм экстремистлик идеология йолына туьспедилер.
Дагестан ерине террористлерди киритуьв мен Россия Федерациясын ишиннен боьлмеге шалыскан Куьнбатар эллерининъ мунда, орысша айтканда, «анклав» туьзуьв ниети толмай бузылганында Магомедали Магомедовтынъ уьйкен уьлиси бар.
Магомедали Магомедовтынъ, тав ерининъ шынты увылынынъ, байыр йигерлиги яркын коьринди Махачкала каласында Оькимет Советининъ меканын савытланган экстремистлер мен бийлейген заманда. Сол мезгилде ДР Оькимет Советининъ председатели Магомедали Магомедовтынъ савытланган аьдемлер мен бийленген меканында иш ислер органлар куллыкшыларсыз шыкканы караклардынъ оьзлерининъ карсы турып болмавына себеплигин тийгистти.
Буьгуьн биз оькимет эм уллы ямагат-политикалык аьрекетшиси, уьйкен аьел басы эм коьримли ата, алал ян косак Магомедали Магомедовты ызгы йолга саламыз. Яшав оьмири заманында ога баьри де, уьйкен сый-оьрмет этуьв мен «атай» деп айтатаган эдилер. Баьри дагестанлылар уьшин ол сондай да ювык аьдем болды.
Биз оны эсимизде дайым да уьйкен йылувлык пан саклаякпыз эм онынъ аьел агзалары ман бирге каты кайгырамыз. Ак юректен олардынъ кара кайгысын боьлисемиз. Онынъ ярык келпети бизим юреклерде дайымга яшар.
А.Межитов,
«Единая партия» ВПП Ногай ерли боьлигининъ толтырувшы секретари.
