Янъыларда «Яс профессионаллар» (WorldSkills Russia) VII Регионаллык чемпионаты йол алды. Ашылув онлайн кебинде оьтти эм савлай Дагестаннынъ мектеблери эм колледжлериннен 20 мынъ окувшы эм студентлер йыйнады. Тувра эфирде алдын озган WorldSkills Russia чемпионатларынынъ енъуьвшилери шыгып соьйледилер. Республикамыздынъ туьрли колледжлерининъ студентлери чемпионат катнасувшыларын Дагестаннынъ туьрли тиллеринде хошладылар эм концерт программасын коьрсеттилер.

ДР Оькиметининъ Председателининъ орынбасары Мурад Казиев чемпионат катнасувшыларына уьстинликлер йорады. Хошлав соьзин оларга ДР билимлендируьв эм илми министри Яхья Бучаев айтты.
Базласлар 55 компетенция бойынша республикамыздынъ ети каласынынъ 20 майданында оьтеек. Эки юзден артык катнасувшылар 5 куьн узагында оьзлерининъ кеспи усталыгын коьрсетееклер. Чемпионат бойынша 6 тоьгерек столлар, Дагестан Республикасынынъ колледжлерининъ йогары технологиялык устаханаларына 3 экскурсия эм 1 мастер-класс оьтееклер. Каравшылар шарага онлайн кебинде косылмага боладылар. Солай ок конкурс тысында шарада баска регионлардынъ ваькиллери катнасаяклар. Баска регионлардан келген конакларга маданият программасы каралган.
Н.Кожаева.