«Единая дежурно-диспетчерская служба» МКУ Ногай районында 2016-ншы йыл курылган. Сол заманнан алып оны Нурдин Шамсутдинович Суюндиков етекшилейди. Мунда баьриси 9 аьдем аьрекетлейди. Куьн сайын эки диспетчер дежурствога шыгады. Баьле-каза анъсыздан, соравсыз келеди, сога коьре от туьсуьв мен байланыслы кате, коммуналлык авариялар, йолда болган баьле-каза акында бириншилерден сол службасынынъ куллыкшылары биледилер. Олар, аьдемлерден яде организациялардан «коьмек керек» деген билдируьвди алып, сонынъ акында тийисли боьликке еткередилер, айтпага, туьскен от акында – от туьсуьвге карсы боьлигине эм сондай баскаларга. Боьликлер болса маьселеди тез арада шешер уьшин баьри куьшин саладылар эм этилген ис акында Биргелес дежурно-диспетчерлик службасына билдиредилер.
– Баслапкы йыллар бизим службада тек 3 аьдем ислейтаган эди. Бир компьютер бар эди. Аьли болса куллыкшылар саны оьсти, тагы да компьютерлер бизге берилди. Дежурный диспетчерлердинъ аьр бир дежурствосы туьрли оьтеди: бир-бирде оьзгерислерсиз болады, арада бир нешев де болмага болады. Республикамыздынъ баска районлары ман тенълестиргенде, бизге баьле-каза акында билдируьвлер аз туьседи, сол да аьдемлердинъ яваплылыгы акында айтпай болмайды, – дейди куллыгы акында Биргелес дежурно-диспетчерлик службасынынъ етекшиси Нурдин Суюндиков.
Нурдин Шамсутдинович оьз ис аьрекетин Бораншы авыл мектебинде завхоз болып баслаган. Сонъ сол авылда МУП директоры, оннан сонъ Терекли-Мектебте Технический инвентаризация бюросында етекшидинъ исин бардырган. Кайсы ерде ислесе де, куллыгына уьйкен яваплылык пан караган. Аьлиги ис орынындагы ийги куллыгы уьшин Дагестан Республикасынынъ ГО, ЧС эм баьле-казадынъ калдыкларын тайдырув бойынша Министерствосыннан ога Сый грамота тапшырылган.
– Службамыздагы аьр бир куллыкшы оьз исин суьеди. Янъыларда дежурный диспетчер Мурат Заретовка ийги иси уьшин «Ногайский район» МР администрациясыннан Сый грамота берилди. Дежурный диспетчерлеримиз юритетаган тыныш болмаган исининъ сулыбын да алып барадылар, кешеси, куьндизи мен олар куьзетте турадылар. Исимизде бизге дайым да «Ногайский район» МР администрациясы коьтергишлев этеди, сонынъ уьшин Ногай район аькимбасы Мухтарбий Аджековка уьйкен савбол айткым келеди, – деп хабарлайды етекши.
Оьзек те, баьле-каза бир де, бир ерде де болмаса экен. Оькинишке, баьле – аяк астында дегенлей, яшавымызда аьр кайсымыз сондай аьллерге анъсыздан туьспеге болады, эм аьдемлерге ярдам керегип турады. Сондай аьлде Биргелес дежурно-диспетчерлик службасынынъ куллыкшылары дайым да, тез эм дурыс ойга келип, оьз ярдамын этпеге асыгадылар. Оларга куллыгында уьстинликлер йораймыз.
Н.Кожаева.
Суьвретте: Биргелес дежурно-диспетчерлик службасынынъ етекшиси Н.Суюндиков эм куллыкшы Б.Картакаев ис аьрекетинде.
