«Билгенге аядай, билмегенге каядай» деген соьзлер бар ногайда. Билимли аьдем мен соьйлемеге де ийги болады, туьрли темаларды коьтермеге сондай аьдемлер мен кызыклы. Соьйтип, Рабият Акманбет кызы Менлиалиева Кумлы авыл китапханасында коьплеген йыллардан бери ислейди. Оьз исине мукаят, билимли куллыкшы китапханага келген балалар ман да, уьйкенлер мен де тил тавып аьрекетин бардырады. Келгенлерге кайсы китап кызыклы, кайсы пайдалы экенин айтады, китапти окыган окувшы ман онынъ акында хабарлап та калады. Авыл китапханасына окымага суьетаганлар тез-тез келедилер.

2017-нши йыл Рабият Акманбет кызы етекшилейтаган китапхана Дагестан Республикасынынъ ийги деген китапханаларынынъ сырасына кирген. Ислеген йыллар ишинде бажарымлы куллыкшы Дагестан Республикасынынъ маданият министерствосынынъ эм Ногай районынынъ администрация аькимбасынынъ Сый грамоталарына тийисли болган. Янъыларда Кумлы авыл китапханасынынъ етекшиси Рабият Акманбет кызы Менлиалиева коьпйыллык аьрекетинде етискен уьстинликлери, йогары кеспилик эм китапханалар тармагын оьрлендируьв куллыгына салган салдарлы уьлиси уьшин Дагестан Республикасынынъ Оькиметининъ Сый грамотасына тийисли болган.

Китапхана бийкеси Рабият Акманбет кызын исси юректен келеяткан байрам ман эм уьйкен баргы ман кутлаймыз, берк ден савлык эм аьел наьсибин йораймыз.

Г.Бекмуратова.
Суьвретте: Р.Менлиалиева эм Дагестан Оькиметининъ председателининъ биринши орынбасары А.Карибов.