«Китап – ол аьдемнинъ кисесине сыйган яйнаган бав», – деп араблар айтадылар. Акыйкатлай да, китаптинъ пайдасы айлак уьйкен. Сога коьре балаларды кишкей, балалар бавындагы заманыннан алып, китапти суьйдирип уьйретпеге керек.

Балаларга китаплер савкатлайтаган эм китап окувга саьбийлерде суьйим эндирип келетаганларды биргелестирген байрам – Халклар ара китаплер савкатлав куьни февральде белгиленди. Сол куьн «Гьидаят» хатынлар орталыгынынъ Ногай районындагы филиалынынъ куллыкшылары Мадина Аджимурзаева, Ашура Сартаева эм олардынъ етекшиси Амина Янгазиева «Юлдыз» балалар бавына бардылар. Конаклар балалар бавынынъ эки уьйкен куьбининъ саьбийлерине китаплер савкатладылар. Олар аьр бир куьпке 20-сар китап элтедилер. Китаплерде болса балалар уьшин язылган эртегилер эм ярасык суьвретлер бар. Келген конаклар балаларга китаплер эм эртегилер акында соравлар бердилер. Балалар уьйкен аваслык пан олар берген соравларга явапладылар. Китаплерди, солай ок эртегилер тынъламага суьетаганларын айттылар.
«Гьидаят» хатынлар орталыгынынъ Ногай районындагы филиалынынъ етекшиси Амина Янгазиева балалардынъ китап пен буьгуьнги йолыгысы коьпке эсинде сакланаягына, оларды ийгиликке, эдаплыкка эм тоьгерек якты суьймеге эм аяп сакламага керегине уьйретеегине сенеди.
Н.Кожаева.
Суьвретте: китаплер савкатлав мезгили.