Янъыларда Госдума ман кабыл этилинип алынган законопроектке коьре, эндигиден армаган табиат газын уьйлерге еткеруьв патшалыктынъ борышы болады. Эгер алдынларда авыл ишиндеги орамларга табиат газын йиберуьв уьшин салынатаган трубаларды яшавшылардынъ карыж шыгарувы ман алынатаган болган болса, аьли кабыл этилинип алынган законопроектке коьре, олар соннан босатыладылар.

– Бу туьрленислер не себептен болды экен? – деген соравды да бир нешевлер бермеге боладылар. Дагес- тан Республикасы, Россия Федерациясынынъ энергетикалык министерствосы ман айырымланган 15 «пилотный» регионлар санына кирген. Олай дегенимиз, сол айырымланган регионларда аьр бир уьйге, яшавшылардынъ карыжларын шыгармай, табиат газын еткеруьв программасы яшавга шыгарылады. Бу программадынъ яшавга шыгарылувы да Россия Федерациясынынъ Президенти Владимир Путиннинъ куьш салувы ман болган.

Ол аьр бир уьйге табиат газын еткеруьв акында ойын бу йылгы Федераллык Йыйынына эткен Язбасында билдирген эди.

Эсинъизге салып озайык, Дагестан Республикасында авылларда газификация аьли де юрип турады. 2021-2025-нши йылларда оьрленуьв программага коьре «Газпром» салган акша саны 13 миллиард маьнет болады, онынъ кырында 2 миллиард станцияларды эм газопроводларда ярастырув куллыклар этуьвге шыгарылган.