«Кыс келер кылышын суьйреп», – деп атайларымыз яздынъ ызында куьнлер эртен-кеш сувытып баслаганын эслеп айтканлар. Соны ман бирге олар: «Тонынъды язда, шепкенинъди кыста аьзирле», – деп те келеек кыска эртерек куьтинмеге керегин билдиргенлер. Бурынгылардынъ сондай акыл соьзлерин эсте тутып, Ногай район электротармакларынынъ куллыкшылары 2021-2022-нши йыллардынъ келеяткан кыс заманына аьзирлик коьруьв ниетте яз айларында хыйлы куллыкларды битирмеге уьлгиргенлер эм эндиги де ислеп турадылар.
– Бас деп биз район ишиндеги ярастырувды талаплайтаган энъ де авыр участокларды ярастырувдан ис аьрекетимизди баслаймыз, неге десе кыс басланганда ок солар ал деп бизге де, халкка да авара бередилер, – деди Ногай РЭС етекшиси Рамиль Муслимов.
Быйыл яз куьнлериннен алып Терекли-Мектеб эм Карагас авыллар тармак участокларында куьз-кыс айларына аьзирленуьв ислери толы кебинде юритиледи. Айтпага, Терекли-Мектеб, Калинин, Ленин, Кара-Сув, Сылув-Тоьбе, Карагас, Орта-Тоьбе, Уьйсалган авылларында бир кесек электротармаклары ярастырылды. Соьйтип район бойынша быйыл 250 курыклар, 3 куьш электротрансформаторлары, 25 шакырымга ювык электротеллер де янъыларына авыстырылган, 8 КТП ярастырылган.
– Биз соны ман бирге аьли ок та келеяткан йылга да ярастырув ислерининъ программасын туьземиз. Район орталыгы Терекли-Мектеб энъ де уьйкен авыл болганнан себеп, мунда электричество ман канагатланув ягыннан да маьселелер коьп. Соннан себеп эндиги йыл биз мундагы электролиниялардагы теллерди, электротрансформаторларды янъыларына авыстыраякпыз. Соьйтип келеяткан йыл Нариман эм Бораншы авылларынынъ электроэнергия линияларына да ярастырув ислери юритилеек, – деп билдиреди Рамиль Муслимов.
Куьз-кыс айларында район бойынша энъ де маьселели зона деп Куьнбатар авылы саналады. Мунда дайым да 3 энергетик дежурствода турадылар. Район энерготармакларынынъ оьзинде де – оперативлик бригадалары аьр заман аьзир кебинде.
Быйылгы ярастырув ислеринде Терекли-Мектеб тармак участогыннан мастери Русланбек Отовалиев, бригада агзалары Аскер Кульчимаев, Ислам Оразбаев, Ислам Межитов, Равиль Муталимов, Камиль Оразалиев, Арсен Межеев, Камиль Атангулов эм баскалар яздынъ иссилигине де карамастан белсенли куллык эткенлер. Карагас тармак участогыннан мастери Абдулла Яриков, Нажмудин Шангереев, Нуру Оразов, Зиявдин Отегенов эм баскалар куьз-кыс айларына аьзирлик коьруьв куллыкларында белсенлик коьрсеткенлер.
Быйыл РЭС-ке конъысы Ставрополь крайыннан автокран, ерди казатаган эм курык коьтеретаган техника да аькелинген.
М.Юнусов.
