Коронавируслы зыянлы мараз, бу соьз биригуьв баслапкы куьнлерде айлак бир шийкенуьв, коркыныш тувдыратаган эди. Ызгы заманларда яшавымыз бан бирге, кулагымызга да уьйреншик болып эситиледи. Сол мараз бан авырыган аьдем акында эситсек, тек савлык йорап коймага да боламыз.

Биз – аьдемлер бу авырув ман яшап уьйренген болсак та, толысынша карсы турып болмаймыз. Зарарланган аьдемлер боладылар, яшав да (аьли сийрек болса да) кыскарган ерлер боладылар.
Тезден мусылманлар дуныясы киели байрамларымыздынъ бириси – Ораза байрамын белгилеек. Бу куьн- лерде катнаслар да айлак куьшли болатаганы биревге де ясыртын тувыл. Араларында сол зарарлы – коронавируслы маразынынъ инфекциясын алып юргенлер де боларлар, эгер саклык тутылмаса, авырувды тагы коьлемлик аьлине кайтармага боламыз.
Буьгуьнлерде Ногай районымыз бойынша, Орталык больницадынъ врач-эпидемиологы Аклима Нургушиевадынъ билдируьвине коьре, коронавируслы маразы ман авырыйтаганлар бар, тек олар амбулаторлы кепте эмленуьв аладылар, олар баьриси алтав болады. Аьли уьшин стационарда бу мараз бан авырыйтаганлар йок деп билдиреди.
– Вакцинация кампаниясы осал озбайды, баслапкы куьнлерден алып, Ногай районымыз бойынша, баьриси 9205 аьдем коронавируслы маразга карсы вакцинады алганлар, ревакцинация эткенлер саны 1444 болады, – дейди Аклима Нургушиева.
Кайсы ерде де аьр бир аьдем оьз савлыгын коршалавда турмага болады.
Г.Сагиндикова.