Янъыларда «Шоьл тавысы» республикалык газетамыздынъ куллыкшылары Ногай район яшавшылары арасында – Сиз аьлиги заманнынъ зарарлы коронавируслы маразына карсы вакцинады алмага ниетинъиз бар ма? – деген сорав берип, тийисли яваплар да алдылар.

Сол соравга Орта-Тоьбе авыл орта мектебининъ эсап сабагынынъ окытувшысы Сеперхан Сеперали кызы Колдасова (суьвретте) булай деп яваплады:

– Янъы окув йылдынъ алдында мен сол коронавируслы маразга карсы вакцинады алдым. Мен бириншилер сырасында алдым деп айтып болмайман. Бу ерде биревге де ясыртын тувыл, мени социаллык тармакларда вакцинадынъ зыяны акында баспаланып турган билдируьвлер сескендирип турдылар. Бир булакларда вакцинадынъ пайдасы акында айтадылар, баскалары «авдарыстырып» кери карап соьйлейдилер. «Кызыл зонада» медицина куллыкшылары кайтип кыйналып ислегенин эсите турып та, мараздынъ барына ынанмай турган заманларымыз да болдылар. Тек авылдасларымыз ызлы-ызыннан авырыганы, яшав оьмирлери уьзилгенлер де болдылар, мага ойланмага эп берди. Соьйтип, мен вакцинадынъ эки де кебин оьттим.
Бу куьнлерде аьдемлер коронавируслы маразга да уьйренип барады. Баслапкы куьнлерде бу авырув акында эситкенде, коркыныш туватаган эди. Аьли вакцина акында, соны эттирмеге керек деп айтса, коьбиси сескенгендей болады. Сондай аьдемлерге айтпага суьемен: «Эгер оьзинъиз акынъызда ойламайтаган болсанъыз, уныкларынъыз, балаларынъыз акында ойланъыз».
Буьгуьнлерде савлык саклав тармагынынъ куллыкшылары баьри мырсатларын кулланып, ис аьрекетлерин бардырадылар. Сога коьре биз авырув йок деп айтып болмаймыз. Болганда да, бу мараз айлак каарлы. Солай ок, медицина куллыкшылары билдиргенлей, авырув ясарады эм авырдан авыр болады.