Дагестан Республикасынынъ бас каласында ДР Билимлендируьв эм илми министри Яхья Бучаев эм Ногай районынынъ аькимбасы Мухтарбий Аджеков йолыгыстылар.

Йолыгыс барысында муниципалитет басшысы ногай тили эм адабиаты бойынша китаплер етиспейтаганы акында соравды коьтерди. Ногай районынынъ мектеблерин толысынша китаплер мен аьжетсизлев уьшин 4578 китаплер керекли, солардынъ ишинде сабаклар бойынша специальли тептерлер де бар.
Яхья Бучаев бу соравды шешуьв бойынша коьмек этееги акында билдирди. Ногай тилинде китаплер Карашай-Шеркеш Республикасында баспаланадылар, сога коьре авторлык ыхтыярлар ерли методистлерге берилген. Сол зат ДР Билимлендируьв эм илми министерствосы ман китаплерди сатып алув исин кыйынлы этеди. Министерство мектеблерди кезеклеп канагатлайды. Баслап ногай тили эм адабиаты бойынша китаплерди 1-4-нши класслар уьшин алув керек, олар баьриси 2893 китап боладылар. Сонъында уьйкен класслар уьшин де китаплер алынаяк.