Дагестан Республикасынынъ Аькимбасынынъ кесек заманга куллыгын юритуьвши Сергей Меликов актуальли маьселелерди еринде шешер ниет пен тез арада регионымыздынъ муниципалитетлерине бармага суьеди. Сондай барувлардынъ бириси – Сергей Меликовтынъ Кубыла Дагестанда уьш куьн ис йорыгы ман болувы.

Республикамыздынъ басшысы кубыла районларынынъ больницаларында, билимлендируьв учреждениелеринде, курылыс объектлеринде болды, ерли яшавшылар ман йолыгысты.
– Аьр бир районнынъ байлыгы – аьдемлер, оларга яшавга сапатлы амаллар туьзуьв керекли, сога коьре мен муниципалитетлерге барып, балалар бавларын, мектеблерин, больницаларын карадым, керекли тапшырувлар эттим, – деп айтты оьз барувы акында регион басшысы.
Кубыла Дагестанда болувынынъ тамамларын келтире берип, Сергей Меликов аьлиги замангы маьселелерди айтты – инфраструктура аьллери, ер соравлар, газ, сув, электроярык пан канагатлав эм сондай баска. Онынъ айтувына коьре, власть органлары оьз куллыгын муниципалитетлерде аьллерди туьзетуьвге, ерли яшавшылар ман тил бирлигин таппага, энъ де кыйынлы маьселелерди шешпеге каратпага керек.
Сергей Меликовтынъ регионымыздынъ районларына, калаларына барувы – Дагестаннынъ маьнели соравларынынъ, маьселелерининъ шешилуьвининъ дурыс эм перспективли йолы.
Г.Бекмуратова,
Россия Журналистлер союзынынъ агзасы