Янъыларда «Эдиге» деген Астрахань областининъ регионаллык ямагат организациясы болган миллет маданият орталыгынынъ президенти Ильдар Альмухамедов ногай ямагаты атыннан Ким Абдуллаевич Шамуковты 90 йыллык мерекеси мен кутлады. Ильдар Альмухамедов мерекешиге Сый грамотасын тапшырды эм савга эсабында белгили суьвретшиси Фахрикамал Махмудовадынъ «Ногай биюви» деген суьвретин тапшырды.

– Ким Абдуллаевич Шамуков – аьлемет аьдем, ата эм атай, сав яшав бойы оьз элининъ онъайлыгы уьшин оьрметли исте озгарган исши болган, – дейди ямагатшы Линара Иргалиева.
Шамуковлардынъ аьели ак ниетли ислери эм йогары патриотизми мен халк арасында белгили. Боьтен де бизге аксакалымыздынъ, шаир, карагаш ногайларынынъ эпикалык аьдетлерин терен билген Абдулла Шамуковтынъ да эстелиги бек баа болады. Онынъ шыгармалары «Ногай давысы» газетасынынъ бетлеринде баспаланганлар, солай болып, Л. Арслановтынъ «Карагаш ногайларынынъ тили» деген китабине де киргенлер, – деп билдиреди «Шоьл тавысы» газетасынынъ хабаршысына Линара Иргалиева.