Бизим Магомед Ахмед увылы Ахмедов йолдасымыз арамыздан дайымга замансыз тайып кетип калды… Эндигиси бизге ол бир де кайтпаяк… Ама онынъ язган асарлары оьмир бойы бизим арамызда яшап тураяк. Эм сога эш бир шек те йок.
Ол бек танъ, билимли эм аьдемсуьер инсан эди. Аьне сол кепте биз оны эндигиси эсимизде дайымга саклармыз. Ол Дагестан Язувшылар союзынынъ правление басшысы эсапта да оьзин тек ийги ягыннан коьрсетип билген эди.
– Язувшылар союзынынъ абырайын оьрлендирди эм бизим Союз Россия еринде ийги ягыннан белгили болып турды. Сонынъ уьшин биз Магомедке мынъ кере разымыз. Ол аьр не затка маьне беретаган эм аьр не затты анълайтаган аьдем эди. Язувшылар эм шаирлер арасында уьйкен дегенде уьйкен сыйы да бар эди. Биз оны бек хошлайтаган эм бек суьетаган эдик: калай аьдем эсабында эм шынты етекши эсабында да.
Мен оьзим оны 40 йылдан артык заман билетаган эм катнасатаган эдим. Сав 22 йыл онынъ колы астында куллык эттим эм оны не ягыннан да ийги билип алдым. Аьне сол кепте ол меним эсимде тураягына эш бир шек те йок.Эндигиси бизге онынъ шат куьлкиси, ашык нур юзли сыпаты етпей тураяк. Заман солай. Бир-бирде ашув да этип кояды.
Магомед Ахмедов оьзининъ Аварстанын эм оьзининъ Дагестанын бек таьтли кепте суьетаган эди. Ол Дагестаннынъ шынты увылы эм шаири эди. Дурысын айтсак, ондай патриотты эндигиси бизге бу ерде таппага кыйын болар. Онынъ сыйы Расул Гамзатовтынъ алдында бар эди эм биз оны ийги билетаган эдик. Магомед Расул Гамзатовтынъ шынты окувшысы эди. Онынъ баьри язганларын ол яттан билетаган эди десек, эш бир янъылыс та болмаяк эм болмас.
«Тавда меним юрегим, оьмир болсын тавларда», – деп, ол оьктемсип бир ятлавында язган эм тавлары да оны эндигиси оьмирлерге мутпаяк, кайтаралап атын оьктемсип айтып келеек…
Магомед Ахмедов ногай адабиатын эм онынъ ваькиллери Иса Капаевти, Кельдихан Кумратовады, Кадрияды, Бийке Кулунчаковады бек оьрметлейтаган эди эм соны да биз оьзимиз сезип келдик.
Шаир Магомед Ахмедов оьлген деп айтпага бек кыйын эм тилимиз де бармайды. Ол тири эм бизи мен яшап та тураяк. Яткан еринъ ярык болсын, Магомед! – деп, буьгуьн ак юректен айтпага суьер эдим:
Кетти шаир арамыздан
кайтпаска,
Кайтпаса да, яшар онынъ
язганы.
Мутпас сени эш бир заман
Дагестан,
Эм де онынъ намысы бар
коьп халкы…
Анвар-Бек Култаев,
Дагестаннынъ Халк поэти