Кайбиримиз де орамда яде ювыкларымызда ойнап юрген балаларды коьрсек, аьдеттеги «баскалардынъ балалары калай тез оьседи» деген соьзлерди айтпай болмаймыз. Соьйтип, Русланбий эм Кабират Дильманбетовлардынъ унык кызы Аишады коьргенде, ойлайман, тек туьнегуьнлерде кишкенекей эди, аьли болса мектебке де юреди. Мен ога кишкейлей «алтын кызалак» деп айтаман, неге десе онынъ шашлары алтын туьсли.
Рашид эм Азиза Дильманбетовлар Терекли-Мектеб авылында яшайдылар, тунъгыш кызлары Аиша оларды тувганнан алып яркыраган куьлемсиреви эм ийги кылыгы ман суьйиндирип келеятыр. «Так-так» этип соьйлеп, ол кайбиримиз бен де тил табады, коьплеген хабарлар айтады. Ол мунъайып турган аьдемге йолыкса, сол аьдем бир-эки такыйкадан сонъ куьннинъ коьзиндей болып яйнайды.
Аиша – биринши класстынъ окувшысы, окымага бек суьеди. Кызалак балалар бавына юретаган заманнан алып, яттан ятлавлар окув конкурсларда катнасады. Озган йыл Сургут каласынынъ ногай яслар союзы ман уйгынланган ана тилинде ятлавлар конкурсында катнасып, Аиша ногай шаири Бийке Кулунчаковадынъ «Ойларым» деген ятлавын окыды. Кызалак союз председатели Р.Алимурзаевтинъ атыннан конкурста белсен катнасканы эм ана тилин таралтувга оьз уьлисин косканы уьшин Разылык хат алды.
Аиша ясамага бек суьеди, А.Джанибеков атындагы мектебте «Точка ростада» аьрекетлейтаган ясав бойынша кружогына юреди, шатраш ойынын ойнайды. Тоьгеректеги дуныя сабагын бек суьеди, янъыларда мектеб олимпиадасында катнасып, биринши орынды алды эм Сый грамотага тийисли болды. Аиша Дильманбетова Ана тиллери куьнине багысланган «Россиядынъ ана тиллери» деп аталган Савлайроссиялык акциясында катнасып, сертификат алган.
Аиша алдына мыратлар салады. Келеекте балаларды эмлейтаган врач болаякпан, неге десе балалар авырымага керек тувыл деп айтады.
– Мен педиатр болмага суьемен. Мен хирург та болгым келеди, неге десе авырыган аьдемлерге операция этпеге керек ше. Дуныяда бирев де авырымасын, – деп айтады Аиша.
Мен куьезленемен сондай кызларымыз бан эм ога келеекте мыратлары толганын ак юректен сагынаман.
Г.Абдулакимова.
Суьвретте: А.Дильманбетова.
