Тарихши, Дагестан Республикасынынъ Ногай районында краевед эм географиялык козгалысынынъ негизин салувшы Бальбек Аджибайрамович Кельдасов (яткан ери ярык болсын) савлай оьмирин оьз халкы уьшин аьрекетлевге багыслаган. Онынъ ойлары, ниетлери халкынынъ аьвелгиси, аьлигиси эм келеектегиси мен байланыслы болган. Быйыл сыйлы яслар насихатшысы тувганлы 90 йыл болды. «Ногайский район» МР администрациясы ман уьстимиздеги 2022-нши йыл Бальбек Кельдасовтынъ йылы деп белгиленген.
Бальбек Кельдасовтынъ йылы бойынша янъыларда Кадрия атындагы орта мектебинде онынъ эстелигине багысланган шара уйгынланды. Мунда окытувшылар Райхан Абдулгаповадынъ, Насипхан Хасбулатовадынъ эм Эльмира Аджимуллаевадынъ окувшылары катнастылар. Сыйлы конак эсабында оьрметли ясуьйкеннинъ увылы Руслан Кельдасов шакырылды, солай ок Бальбек Аджибайрамовичтинъ немерелери, Кадрия атындагы мектебининъ окувшылары Зейнап эм Хадиджа ортакшылык эттилер. Биринши соьзди Кадрия атындагы мектебининъ уйгынлав иси бойынша етекшидинъ орынбасары Зульфия Отарова алды. Ол Бальбек Аджибайрамович ногай ярыкландырувшылар А.Джанибеков, М.Курманалиев, Ф.Абдулжалилов, С.Капаевтинъ баслаган ислерининъ бардырувшысы болатаганын белгиледи. Зульфия Сапаралиевна балаларга Бальбек Аджибайрамовичтинъ ногай халкынынъ асабалыгын саклав ниетте эткен ислери акында айтты. Ол бу шарадан сонъ, мунда катнаскан аьр бир окувшыдынъ юрегиндеги сый оьрметли Бальбек Кельдасовка боьтен де уьйкен эм терен болар деген сенимин билдирди.
Руслан Кельдасов атасынынъ билимге куьшли ымтылысы, берген насихат соьзлери акында айтты. Онынъ хабарыннан йыйылганлар Бальбек Аджибайрамовичтинъ баславы ман ногайлар акында биринши документальлик фильми аьзирленуьвде кайдай куллыклар юритилгени акында билдилер. Руслан Кельдасов балаларды оьз халкы, онынъ оьрленуьви уьшин куьшин аямаска, сол исте эм дайым да тыпак болмага шакырды. Мектеб етекшиси Альфия Акимова да оьз соьзин айтты. Ол да балаларга оьз насихатын эм маслагатын берди.
Кадрия атындагы мектебинде озган шара бек ийги, коьнъил коьтерилис аьлде оьтти. Ол тек балалар уьшин тувыл, баьри катнасканлар уьшин бек пайдалы эм кызыклы болды.
Н.Кожаева.
Суьвретте: Б.Кельдасовтынъ кедеси эм немерелери, Кадрия атындагы мектебининъ етекшиси А.Акимова.
