Полиция куллыкшысы, аьскерши эм сога келисли кеспилерди тек эр кисилердики деп айтпага да болар эди, эгер бу тармакларда наьзик ийинли, тал белли хатынлар ислемейтаган болсалар.

Оьткен оьмирдинъ сексенинши йылларында бу тармакта ис аьрекетин бардыратаган кыскаяклыды коьрсенъ, тамашага калмай болмайтаган эдинъ, оларды сыйлав да баскаларга коьре, артык болатаган эди. Олардан ийменгенлер де болатаган эдилер.
Заманлар оьттилер, 90-2000-ншы йылларда уьстилерине милиция, сонъында полиция куллыкшысынынъ кийимин кийген кыскаяклыларды коьп коьретаган болдык. Солардынъ бириси Марзият Куруптурсуновна Шураева болады.
Марзият Шураева Ногай районы бойынша МВД боьлигине куллык этпеге келгенше, Шешен Республикасында маданият тармагында, сонъ Ногай патшалык саз алатлар оркестринде администратор болып куллык эткен.
Ногай районы бойынша МВД боьлигинде Марзият Куруптурсуновна патруль-пост службасынынъ батальон милиционери ис орынында баслады. Оьзек те, баслап ол тийисли сынавларды оьтти, оннан сонъ тек ис борышларды толтырувга куьшин салды. Сол ис орында ислей турып, тамада сержант – аьскершилик дережесине де етискен. Марзият Шураева оьзининъ исин заманы ман, тийисли йорыкларды тутып, толтырмага шалысатаган аьдем. Ол баслап милиция, сонъ полиция боьлигинде ОБ ППС куллыкшысы болып иследи, аьли болса, Марзият Куруптурсуновна Шураева Ногай районы бойынша МВД боьлигинде делопроизводитель болып ислейди. Ол бу ис аьрекетти бардырганлы да бес йылдан артып барады. Сулыплы куллыкшысы оьзининъ билгенин яслардан аямайды, керек ерлерде маслагатларын да берип турады. Ол бу тармакта ислей турып, Краснодар каласындагы МВД академиясында окып, юриспруденция специальности бойынша кеспиди алган.
Алдымызда – Хатын-кызлар байрамы. Сол байрамды Марзият Шураевага ийгилик пен йолыкканды йораймыз. Алдыда сизге ден савлыкты, узак наьсипли оьмирди, дайым янынъызда суьйген аявлы аьдемлеринъиз болып, яшавга суьйинип турганды сагынамыз.
Г.Сагиндикова.
Суьвретте: М.Шураева.