Караша айынынъ 29-ншы куьнинде 14.00 саьатте Махачкала каласында И.Шамиль, 31 «г» проспекти адреси бойынша «Россия – меним тарихим» тарих паркында «Россия халклары: Ногайдынъ асабалары» деп аталган документальли фильмининъ презентациясы эм коьрсетуьви озгарылаяк (режиссеры К.Исаева). Бу проекттинъ авторы – Пятигорск каласындагы АНО «Ямагат проектлерининъ лабораториясы». Фильм Сырт-Кавказ Федераллык округында Россия Федерациясынынъ президентининъ толы ыхтыярлы ваькилининъ аппаратынынъ эм яслар ислери бойынша Федераллык агентствосынынъ коьтергишлеви мен салынган.
«Россия халклары: Ногайдынъ асабалары» – толы метражлы документальли фильм, ол ногай халкынынъ тарихине эм аьлиги яшавына багысланган. Бу фильмнинъ баьтирлери – Москвада, Дагестан, Карашай-Шеркеш, Шешен Республикаларында, Ставрополь крайында, Астрахань областинде яшайтаган ногай халкынынъ суьвретшилери, спортсменлери, тарихшилери, ямагат аьрекетшилери.
Мен баьри ердеслеримди, ногай халкынынъ ваькиллерин «Россия халклары: Ногайдынъ асабалары» документальли фильмининъ презентациясы эм коьрсетуьвинде катнаспага шакыраман. Д.Эсиргепов, «Ногайский район» МР аькимбасы.