Сизди Ислам динининъ энъ бас эм сыйлы байрамларынынъ бириси – Курбан-байрамы ман ак юректен кутлаймыз.
Алла-Таала сыйына курман шалув хадж, Меккага барувдынъ тамамланганын белгилейди.
Бу киели байрамнынъ терен эдап-акылды, ынаным берклигин эм ян суьйинишин алып баратаган маьнелиги бар. Оьмирлер бойы Курбан-байрам языксынувдынъ, диннинъ аьдет-йорыкларын сыйлавдынъ белгиси болган. Бу ярык байрам шынты мусылманларды бирлестиреди, олар ара байланысларды беркитеди эм бир-бирисине коьмек этпеге, ярлыларга эм керексинлерге коьмеклесип, кол созбага даьврендиреди.

Бу дайымлык анъ-акыл баалыклар савлай дуныя аьдемлерде келеектеги ийгиликлерге сенимликти беркитеди, халклар ара анъламлыктынъ оьсуьвине, тынышлыкты эм макулласувды тутувга себеплигин тийгистеди.
Бу байрам куьнинде, сыйлы дин кардашлар, ак юректен сизге, сизинъ ювыкларынъызга эм кардаш-тувганларынъызга берк ден савлыкты, баьри онъайлы ислеринде уьстинликлерди, тынышлыкты эм макулласувлыкты йораймыз. Аьр уьйге бу байрам суьйиниш аькелип, танълагы куьнге сенимликти беркитсин.
«Ногайский район» МР администрациясынынъ аькимбасы   Д.Эсиргепов.
Ногай район Депутатлар Йыйынынынъ председатели  Р.Байманбетов.