Бу юмадынъ дуьйсемби куьнинде аьдетке кирген аппаратлы йыйын «Ногайский район» МР администрациясында болып озды. Йыйыннынъ барысында куьзги кыр куллыклар акында «Ногайский район» МР-нынъ Авыл хозяйство управлениесининъ куллыкшысы Д.Аманиязов шыгып соьйледи.
Буьгуьнлерге куллыклар юредилер, тек коьликлердинъ етиспевлиги бираз буршав береди. Конъысы Ставрополь крайыннан аслык шашув алатлар, техника аькелмеге туьседи. Йол бойларындагы майданларда язгы шашувлардан сонъ калган пленкалар коьзди де кувантпайдылар, ерге де зыян бермесе, пайда бермейди. Соларды йыюв куллыклар да осал юреди. Тек авыл хозяйство куллыкшысынынъ айтувына коьре, сол ерлерди берген иелери оьз байырлыкларын тазалатувдынъ каьрин шегедилер.
Онынъ соьйлеген соьзине «Ногайский район» МР администрация аькимбасы М.Аджеков та косылды. Эгер кыр куллыклары юруьви техникадынъ етиспевлигиннен иркилетаган болса, бизим районымызда МТС ашылмага амал барын билдирди.
– Янъыларда биз Дагестан Республикасынынъ Авыл хозяйство министри мен йолыгысканда сол МТС ашылув акында соьз коьтерилди. Биз сол МТС-ты ашып, аькелинген техника кулланылаяк болса, илгерилик акында ойланмага да боламыз, – деди ол эм керекли техникады белгилеп, справка аьзирлемеге УСХ куллыкшысына борыш берилди.
«Ногайский район» МР администрациясынынъ аькимбасы М.Аджеков амал тавып, йол бойларыннан ерлер аслык, бакша ясылшаларын, емислерин шашпага берилмеге керек тувыл, солай болганда куьзги шакларда олардынъ артларыннан калатаган кокыслар табиаттынъ да ярасыклыгын бузады, коьзге де эрши болып коьринеди. Онынъ айтувы ман мал отлаклар тек мал отламага кулланылмага кереклер. Бу йыл коьбиси бакша шашканлар бай емисин де алмаганлар эм сатув да осал болган. Коьп аьдемлердинъ кыйынлары ерде калды. Сонынъ да себеплери коьп…
Йыйын барысында бизим районымызга авыл маьселелердинъ бириси – йол соравы да коьтерилди. Аьр бир авыл поселениелери оьзлерине йол каравга берилген акшадынъ шыктажланганы акында эсап бердилер. Бу соравлардан баскалай, йыйында Орта-Тоьбе авыл орта мектебининъ курылысы, тезден Терекли-Мектеб авыл еринде курылаяк спорт майданы, район еринде «Чистая вода» программасы бойынша казылаяк артскважиналар, «Доступная среда» программасы бойынша Куьнбатар авыл орта мектебинде сакат балаларга онъайлы окувды туьзер уьшин куллыклар этилинеди.
Йыйын барысында районымызда этилинмеге керек куллыклар акында соьйленди, энди солардынъ шешилуьви кайсы яктан да онъайлыклар аькелер деп сенемиз.
Г.Сагиндикова.
