Сессиядынъ баслапкы соравы бойынша район депутатлар алдында Ногай районынынъ 2021-нши йыл уьшин социал-экономикалык оьрленуьви акында эсап беруьв доклады ман Мухтарбий Аджеков шыгып соьйледи (онынъ докладын газетамыздынъ сайтында эм бу номерде окымага боласыз).
Муннан сонъ 2022-нши йылга эм 2023-2024-нши йыллардынъ план кезегине Ногай район бюджетине туьрленислер киргистуьв акында сорав бойынша район администрациясынынъ финанслар боьлигининъ етекшиси Арслан Кусегенов билдируьв этти. Депутатлар бу соравды ойласкан сонъ тийисли карар кабыл этип алдылар.
Сессиядынъ куьн йосыгында белгиленген Ногай район Уставын «Россия Федерациясында ерли самоуправлениеди уйгынлавдынъ ортак принциплери акында» деп аталган 2003-нши йылдынъ 6-ншы октябриндеги Федераллык законына киргистилген туьрленислер мен келисли кепке келтируьв акында Ногай район прокурорынынъ куллыгын юритуьвши Аскер Дильманбетовтынъ протестин ойласып карав акында соравды район парламентарийлери эндиги сессияга калдырдылар.
Йыйылганлардынъ каты айып- лавын тувдырды район администрациясынынъ ер тергев бойынша боьлигининъ етекшиси Алимурза Менглиязовтынъ эсап беруьвинде авыл хозяйстволык маьнелиги болган ерлерди дурыс кулланув артыннан юритилген тергевлер бойынша айтылган фактлар ман коьрсетилген фотосуьвретлер. Бу яктан йыйы кепте болатаган бузувлардынъ бириси – ол ерлерди целлофан пленкалары ман батырув, отлакта мал багув нормасын тутпав, район ерлерин ыхтыярсыз байырлав. Сондай законды бузувлар ман байланыслы 42 материаллар йыйналган. Солар баьриси де Ногай район эм республикалык прокуратураларына йиберилген. Бу куллыкты юритуьвде район ер тергев боьлигине Ногай район ыхтыяр саклавшы органлары етекшиси Наиб Каракаев пен бирге уьйкен коьмегин этеди деп белгиледи А.Менглиязов.
«Быйыл районда 4 мынъ гектарларда пленка астында карбызлар шашылган. Сол пленкалар карбызлардан сонъ, эгер йыйналмаса, биз сонда ок керекли ерлерге тийисли материалларды аьзирлеп йибереекпиз деп билдиремиз», – деди районнынъ ер тергев боьлигининъ етекшиси. Ол солай ок авыл хозяйстволык маьнелиги болган ерлерде законсыз артезианлар казылатаганы акында да айтты. Сонынъ сырагысында авыл яшавшылары уьшин янъы артезианлар казганда, ишпеге яравлы таза сув шыкпайды. Район администрациясынынъ ер тергев боьлиги эндигиден армаган сондай фактларды да тергеек.
Оннан сонъ Кадрия атындагы парк ишиннен ямагат тамакланув объекти – кофейня курылысы уьшин 200 гектар ер беруьв акында сорав ман сессия катнасувшыларын район администрациясынынъ муниципаллык муьлки бойынша боьлигининъ етекшисининъ куллыгын юритуьвши Арсен Сабутовтынъ таныстырувы йыйылганларда уьйкен сорав тувдырды. Район депутатларынынъ бир кесеги, Мадина Абдулалимова эм баскалары макул тувыл экенин билдирдилер. Ызында депутатлар бу соравды ойласувды эндиги сессияга калдырдылар.
Сессияда каралган соравлар бойынша оьз ойлары ман район Депутатлар йыйынынынъ председатели Джамалутдин Эсиргепов, Шумлелик авылыннан район депутаты Омаргаджи Шахбанов эм баскалар боьлистилер.
