Узак ерге кетип ислейтаган ердеслеримиз, Аллага шуькир, ногай халкымыздынъ аьдетлерин мутпайдылар. Балаларын ногайша соьйлеп уьйретип, оларды туьрли конкурсларда катнастырадылар. Аьлиги заманда социаллык тармакларыннан элимиздинъ туьрли муьйислеринде озатаган шаралар акында билемиз.

Мен тар байланыс Сургут каласында яшайтаган эм аьрекетлейтаган ногай синълимиз Нурия Терикова ман тутаман. Ол Сургут каласынынъ Ногай яслар ямагат союзынынъ агзасы болады, бу ямагат организацияды Расим Алимурзаев етекшилейди. Баскалай Нурия «Биз – россиянлылар» деп аталган Россия халкларынынъ яслар Ассамблеясынынъ ревизоры, ол – ногай халкымыздынъ шынты патриоты болады.
Янъыларда Белый Яр авылында «Миллет тойларынынъ фестивали» деп аталып, уьйкен шара озды. Фестиваль эки кезек болып оьтти. Оьз халкынынъ той аьдетлерининъ бирисин бизим ногайлар да коьрсеттилер. Биринши кезекте катнасувшылар йыр программасы бойынша сынастылар, ногай халкын белгили эм талаплы йыравшымыз Узаир Найманов коьрсетти. Аьлиги заманда коронавирус маразы ман байланыслы болып турган аьллерге коьре, кавыфсызлык амалларды тутув ниет пен фестиваль уйгынлавшылар экинши кезекти каравшыларсыз оьткермеге токтастылар. Фестивальди уйгынлавшылардынъ ишинде ерли власть органларын эм дин аьрекетшилерин белгилев керек болады.
Фестивальди башкир халкы баслады, бу халктынъ ваькиллери миллет аьдетлерин коьрсеттилер. Шарада кыргыз, орыс, украин эм баска халклардынъ той аьдетлери коьрсетилди. Ногайлар «Таьвкеше» деген ногай аьдетин коьрсеттилер – келин туьсируьв аьдет.
Фестиваль ногай йырлавшы Эдиге Куруптурсуновтынъ «Домбыра» деген йыры ман тамамланды. Баьри халкларды бирлестируьв ниет пен этилинген шара уьйкен байрам болып озды. Ногай яслар союзы фестивальде катнасувга оьз коьмегин эткен аьдемлерге уьйкен савбол айтады. Айырым разылык «Кавказ» ансамблине эм айырым Арслан Казиевке айтылды.
Баска халклардынъ маданияты ман танысув, халклар арасында дослыкты берклендируьвде мундай шаралар бизге маьнели болады.
Г.Бекмуратова.
Суьвретте: фестиваль катнасувшылары.