Ногай районында спорт тармагын оьрлендируьвде салдарлы косымын этип келген аьдемлердинъ бириси – «Дагестан Республикасынынъ спорт эм физическая культура бойынша ат казанган куллыкшысы», «РСФСР Гражданлык оборонасынынъ отличниги» деген сыйлы атларга тийисли этилген Зейнулла Магомедович Менлигулов.
Ол 1951-нши йылдынъ карагыс айынынъ 15-нши куьнинде Нариман авылында тувган. Ерли мектебинде окыган яс Душанбе каласындагы техникумына туьсип, оны етимисли тамамлайды. 1969-ншы йыл оьзи окыган мектебинде ис аьрекетин баслайды. Онынъ колында билим алган коьплеген ясларымыз, спортка суьйимин арттырып, етимислер коьрсетип келедилер. Онынъ етекшилиги мен Нариман авылынынъ окувшылары район, республика бойынша ярысларда ортакшылык этип, коьп кере енъуьвши болып, районымыздынъ, Нариман авыл мектебининъ атын айттырып, сыйын коьтерген. 1989-ншы йылда Зейнулла Магомедовичтинъ етекшилиги мен Нариман авылына Махачкаладан белгили болган «Динамо» деген футбол клубы да конакка шакырылганын да белгилемей болмаймыз. Бу йолыгыс окытувшы ман авыл командасынынъ сол белгили клуб катнасувшылары ман футбол ярысы бойынша куьшин сынав, сулыбын оьстируьв, ойын сыхырлыгына уьйренуьв мырат пан уйгынланган эди. З.Менлигулов авыл стадионын, спорт майданларынынъ ашылувында да оьз куьшин салган аьдем болады. Ол коьп кере оьз окувшылары ман Дагестаннынъ туьрли калаларында, авылларында болып, оьткен ярысларында катнасып, команда катнасувшылары ман енъуьвши орынларына тийисли болып келген. «Урожай» деген физкультура-спорт ямагатынынъ председатели заманында да Зейнулла Менлигулов районнынъ спорт тармагын яйылдырувда коьп куллыклар этип келди. Онынъ аьрекетлеви мен оьрметли Баьтиримиз А.Асановтынъ, Ис Баьтирлеримиздинъ эстелигине, солай ок, ногай халкымыздынъ баска белгили аьдемлерине турнирлер ашып эм шатраш ойыны бойынша базласувлар озгарып келген.
Ол ян косагы Мутли Ибрагимовна ман татым аьел курып, уьш аьвлетлери: Эльмира, Эльдар, Алавдинди тербиялап, яшавдынъ тувра йолына салдылар. Зейнулла Магомедовичтинъ 5 уныклары эм йиенлери Асият, Ренат, Диана, Милана эм Эмир атайынынъ коьрсеткен йолы ман тувра барып, онынъ етимислери мен оьктемсийдилер эм спортка уьйкен аваслыгы ман баскаланадылар. Бу йылдынъ карагыс айынынъ 15-нши куьнинде сыйлы ясуьйкенимизге 70 яс толаяк эди, ама мараз оны замансыз арамыздан аькетти.
Янъыларда Нариман авыл орта мектебининъ спорт залында авыл мектебинде коьп йыллар бойы физкультура дерисиннен окытувшы аьрекетин юриткен З.Менлигуловтынъ эстелигине эм онынъ 70 йыллык мерекесине багысланган кыскаяклылар командалары арасында волейбол турнири уйгынланып оьтти. Шара Менлигуловлардынъ аьели мен, Нариман авыл администрациясынынъ аькимбасы З.Суюндиков пан эм Нариман авыл мектебининъ физкультура дерисиннен окытувшысы, ерли мектебтинъ Зейнулла Магомедовичтинъ окувшысы Агабатир Эдильбаев пен уйгынланган эди.
Волейбол турниринде 6 кыскаяклылар командалары, айтпага, Нариман авыл мектебининъ окувшы кызлардан эм окытувшылардан туьзилген командалары (тренер А.Эдильбаев), Куьнбатар авыл мектебининъ (тренер Т.Махмудов), Червленные Буруны авыл мектебининъ (тренер А.Акмурзаев), Терекли-Мектеб авылынынъ А.Джанибеков атындагы мектебининъ (тренер А.Койбаков) эм Кадрия атындагы мектебининъ (тренер Э.Ораков) командалары ортакшылык эттилер. Зейнулла Менлигуловтынъ эстелигине багысланган турнирде онынъ ис йолдаслары, тенълери, дослары, ясуьйкенлер, айтпага, С.Муллаев, Н.Зарманбетов, К.Асанов, З.Мунгайтпасов онынъ яшав йолы, эткен аьрекети, ис аьрекетинде етискен уьстинликлери акында белгилеп, эслерине туьсирдилер.
Кызыклы эм тиресуьвли ойынында Нариман авылынынъ окувшылар командасы биринши орынга тийисли болды (суьвретте). Оларга кубок, медаль, 5 мынъ маьнет акшалай савгасы эм сактыян тобы тапшырылды. Экинши орынды Терекли-Мектебтинъ А.Джанибеков атындагы мектебининъ командасы бийледи. Олар сактыян топ, 1,5 маьнет акша баргысы, медаль берилди. 3-нши орынды Нариман авыл орта мектебининъ окытувшылар командасы алды. Оларга сактыян тобы, медаль, 1 мынъ маьнет акша ман савгаландылар. Баска болып, волейбол ойынынынъ ийги деген катнасувшыларына Менлигуловлардынъ аьели атыннан акшалай баргылары, туьрли савгалары да тапшырылдылар.
Солай болып, сав шара барысында Менлигуловлардынъ аьели волейбол турнирининъ баьри катнасувшыларына да, конакларына да сыпыраларына салынган туьрли зияпетлерин, исси асын, сувын таттырып, хош коьрип алды.
Нариман авыл орта мектебининъ спорт залында оьткен эстеликли волейбол турнири кызыклы оьтти.
Г.Нурдинова.
