«Эгер сиз исти уьстинликли сайлап, ога янынъызды берсенъиз, наьсип сизди оьзи излеп табар», – деген К.Ушинский. Акыйкатлай да, аьдем куллыгын суьетаган болса, онынъ баьри билетаганын оьз исинде коьрсетпеге яде оьрлендирмеге амалы болады. Сол заманда ямагаттынъ онъайлыгы уьшин юритилген ис байыр наьсиптинъ булагы болады. Сога коьре кеспиди сайлавга аьр бир аьдем бек уьйкен яваплылык пан карамага керек.
Тезден окувшылар, оькимет сынавларын оьтип, суьйикли кесписин байырлар ниетте, окув ошакларына билим алмага бараяклар. Олардынъ алдында тыныш болмаган, коьп ойландырган «Кайдай кеспиди сайлайым?» деген сорав турады. Биревлер коьптен бери яны суьйген кеспиди сайлап та алган боладылар, баскалар болса коьп ойланадылар. Ызгы белгиленгенлер бир яктан ата-анасынынъ соьзин ерге туьсирип болмайдылар, баска яктан оьзининъ мырадыннан да айырылмага суьймейдилер. Сол тыныш болмаган соравды шешпеге эм окувшыга кеспи сайламага коьмек этер ниетте Яшавшыларды ис пен канагатлав боьлигининъ куллыкшылары районымыздынъ окувшылары ман йылда эки кере йолыгысадылар.Янъыларда олар, Орта-Тоьбе авыл мектебине барып, кеспи сайлав бойынша «Кеспи компасы» деген шара озгардылар. Бу шарада «Ногайский район» МО-сындагы ДР-нынъ «ЦЗН» ГКУ етекшиси Рустам Такташев, билимлендируьв боьлигининъ куллыкшысы Байрамали Бекмурзаев, Орта-Тоьбе авыл мектебининъ етекшиси Сапият Межитова, етекшидинъ уйгынлав иси бойынша орынбасары Сеперхан Джумагишиева, Яшавшыларды ис пен канагатлав боьлигининъ куллыксыз гражданларды кеспи яктан уьйретуьв эм соравларына явап беруьв бойынша инспекторы Индира Сахтаева, «Ногайский район» МР администрациясынынъ ясы етпегенлердинъ ислери эм олардынъ ыхтыярларын коршалав бойынша район комиссиясынынъ секретари Алина Акмурзаева эм Орта-Тоьбе авылынынъ 8-11-нши классларынынъ окувшылары катнастылар. Бас деп Сапият Межитова йыйылганларга хошлав соьзлерин айтты. Сонъ бир неше окувшы сайлаган кесписи бойынша оьз докладлары ман шыгып соьйледилер. Олар не уьшин сол кеспиди сайлаганы акында хабарладылар.Рустам Такташев кайдай мырат пан олар бу мектебке келгенлерин айтты. Ол ясларга кайдай да бир себеплерден выпускниклер окув ошагына окымага туьсе алмаса, «Ногайский район» МО-сындагы ДР-нынъ «ЦЗН» ГКУ-на аьризе язып, куллыксыз экенин билдирмеге маслагат берди. Эгер куллык бар болса, оларга билдирилеек, йок болса, Яшавшыларды ис пен канагатлав боьлигининъ коьмеги мен Кизляр каласында коьлик айдавшы, делдекши яде баска исине окымага болаякларын билдирди.
Индира Сахтаева балаларга аьлиги заман керекли болган ислер акында кызыклы хабарлады. Сонъ ол балалар ман туьрли тестлер эм ойынлар озгарды. Сол тестлер аркалы, окувшылардынъ касиетлерине коьре, кайдай исти олар келеекте суьйип толтыраягы аянланды.
Байрамали Бекмурзаев Ногай районынынъ выпускниклери сырасында ызгы уьш йыл ишинде медицина ман байланыслы кеспилер сайлаганлар коьп экенин билдирди. Солай ок окув ошакларын окып тамамлаган сонъ, олардынъ коьбиси элимиздинъ туьрли калаларында ислейтаганлары да белгили. Соьйтип, Ногай районынынъ мектеблеринде билим алган врачлар эм медсестралар районыннан алыс ерде аьрекетлеп, уьйкен уьстинликлерге етиседилер. Сол да уьйкен куьез аьр кайсымызга да.
Алина Акмурзаева яны суьйген кеспиди байырлавда окып басламага бир де кеш тувыл экенин белгиледи. Ол оьзи бас деп юрист, сонъ педагогикалык окув ошагында окыганын айтты. Алина Расуловна суьймеген ис суьйиниш аькелмеегин белгиледи.
Яшавшыларды ис пен канагатлав боьлигининъ куллыксыз гражданларды кеспи яктан уьйретуьв эм соравларына явап беруьв бойынша инспекторы Индира Сахтаевадынъ соьзлери мен, аьлиги балалар бек йигерли, кайсы соравларга да явап тавып боладылар, кайсы яктан да билимлери ийги. Ол Орта-Тоьбе авыл мектебининъ 8-11-нши классларынынъ окувшылары ман озган йолыгыс етимисли оьткенин белгиледи.
Н.Кожаева.
Суьвретте: йолыгыстан коьринис.
