Озган айдынъ ишинде Москва каласында II Савлайроссиялык класс етекшилерининъ форумы озды. Бу шарада 89 регионлардан 1300 класс етекшилери катнастылар. Дагестан Республикасыннан форумда 30 окытувшы ортакшылык эттилер.
Форумды Россия Президентининъ администрациясынынъ етекшисининъ биринши орынбасары Сергей Кириенко эм ярыкландырув министри Сергей Кравцов хошлав соьзи мен аштылар. Олар баьрисине де оьз исин алаллык пан юриткени уьшин эм йогары кеспилик уьшин разылыгын билдирдилер, солай ок класс етекшилерининъ куллыгынынъ маьнелигин белгиледилер.
Шарадынъ бас темалары – тербиялавдынъ эм окытувдынъ психологиясы, окытувшыдынъ ис алаты – Интернет, окытувшыдынъ келпети эм онынъ тыс дуныя ман байланысы.
Эки куьннинъ ишинде класс етекшилер туьрли шараларда катнастылар, мастер-класслар, тоьгерек столлар озгарылды. Окытувшылар оларды кызыксынатаган соравларга яваплар алдылар, сулыбы ман боьлистилер, биргелесип, кызыклы проектлер туьздилер.
Дагестан Республикасынынъ илми эм билимлендируьв министри Яхья Бучаевтинъ айтувы ман, форум окытувшыларды бирлестирди, ол окытувшылык тармагынынъ бирлигин коьрсетти.
– Класс етекшилер форумы савлай элимиздинъ мынълаган окытувшыларын бирлестиреди. Бу шара кеспи биригуьвлердинъ оьрленуьвининъ, сулып пан боьлисуьвдинъ майданы болады. Биринши форумнынъ катнасувшылары аьлиги заманда да бир-бириси мен тар байланыс тутадылар, – деп белгиледи министр.
Ногай районыннан форумда А-Х.Джанибеков атындагы мектебтинъ окытувшысы Гульнара Солтахан кызы Хозбулатова катнасты. Ол – «Энъ де классный классный» ерли конкурсынынъ енъуьвшиси, республикалык конкурсынынъ призеры, «Илмилер ясларды даьвлендиредилер» республикалык конкурсынынъ, «Бизим тарих» Савлайроссиялык конкурсынынъ енъуьвшилерининъ илми етекшиси, Астрахань каласында озгарылган регионлар ара семинар-практикумнынъ катнасувшысы. Гульнара Солтахан кызы СКФО Савлайроссиялык «Билимлендируьв флагманлары. Мектеб» конкурсында ортакшылык эткен.
Окытувшы оьз кесписин суьйип ислесе, куллыгынынъ сырагылары да ийги болады. Гульнара Хозбулатовадынъ окувшылары туьрли конкурсларда енъуьвшилер боладылар. Сол зат онынъ терен билими, йогары кеспилиги акында айтады.
– Мага форумнынъ кайтип оьткени бек ярады. Биз, окытувшылар, оьзимизге коьп янъылыклар, билдируьвлер алдык, келеекте биргелесип, маьнели проектлер, шаралар уьстинде ислеек болдык. Сонда алган билимди, янъылыкларды мен оьз исимде кулланмага ниетленемен, – деп хабарлайды форум катнасувшысы.
Сондай маьнели шаралар пайдалы эм керекли деп айтпага боламыз.
Г.Бекмуратова.
Суьвретте: Г.Хозбулатова.
