Янъыларда, Уллы Енъуьв куьниннен коьп заман оьтпей, Ногай район орталык китапханасында «Биз сизинъ йигитлигинъизди дайым баалаякпыз» деп аталып, Уллы Аталык согысынынъ ветеранлары Муса Аджигайтар увылы Отаровтынъ эм Бадий Явлан увылы Аджигельдиевтинъ 100 йыллык мерекелерине эм эстелигине багысланган тоьгерек стол озды.
Бу шарада сыйлы ветеранларымыздынъ кызлары, Кадрия атындагы орта мектебининъ окувшылары, китапхана куллыкшылары эм Уллы Аталык согысында катнаскан, бизим бу куьнги яшавымыз уьшин янларын аямаганлардынъ эстеликлерине сый эткен аьдемлер, Ногай районынынъ Ясуьйкенлер советининъ председатели Зубаир Зийней увылы Аджибаев, Согыс эм Савытлы куьшлер советининъ председатели Акманбет Муса увылы Сангишиев, шаир Магомет Янмурза увылы Кожаев ортакшылык эттилер. Бу аьдемлердинъ аьр бириси бизим сыйлы ветеранларымыз бан кайдай ерлерде аьллескенлери акында, олардынъ балалары атасы уьйде кайдай аьдем болганы, оларды кайтип тербиялаганлары, балаларына кайдай коьрим болганлары акында хабарлап кеттилер.
Соьйлегенлердинъ коьбисининъ хабарыннан Муса Аджигайтар увылы Отаров кайдай каьмбил, ама маскараламага да суьетаган аьдем болганы акында билдик. Оьзининъ яшав оьмиринде Муса Аджигайтар увылы бек яваплы ис орынларда ислей келип, оьзининъ тек аьдиллигин коьрсетип келген.
Муса Отаровтынъ кызы Оьлмес онынъ кайдай ата болганы акында йыйылганларга хабарлады. Ол согыс ветераны болып, сол темага багысланган кинофильмлерди карамайтаган эди. Басланганын коьрсе де, колын силтеп, «ялган коьрсетедилер» дейтаган болган.
Зубаир Аджибаевтинъ хабарыннан ол халкын бек суьйген аьдем болганын билдик.
«Шоьл тавысы» республикалык газетасынынъ редакциясында куллык эткен заманларын оны ман бирге ислеген Магомет Кожаев эскерип кетти. Ветеран акында хабарлар бек кызыклы эди. Ога багысланган видеосюжет те коьрсетилди.
Тап соьйтип, видеосюжеттен басланды Бадий Явлан увылы Аджигельдиев акында эскеруьв де.
– Атам согыс акында хабарламайтаган эди. Ол оьзининъ эткен иси уьшин яшавы бойынша сый да коьрмеди. Олар тек Енъуьв куьни келгенде кырга байрамшыламага шыгатаган эди. Сол да кайдай байрам болган десенъиз, шоьлде кайнаган сорпа эм дав майданларда калган йолдасларды коьзяслар ман эскеруьв. Ол согыс йылларында алган «За отвагу» медалин аявлап саклайтаган эди. Сол медальди не уьшин алгансынъ деген соравга: «За языка» деген явап беретаган эди, – деди Асият Бадий кызы Манкаева.
Бадий Явлан увылы Аджигельдиев те согыстан сонъгы йылларда Ногай район экономикасын оьрлендируьв уьшин коьп куллыклар эткен, ол бизим газетамыздынъ куллыкшысы да болган.
Бу эки ветераннынъ да калеми астыларыннан оьткир темалы макалалар шыкканлар. Окувшылар араларында сый ман да пайдаланганлар. Газетамыздынъ эсли куллыкшыларынынъ эслеринде бу аьдемлердинъ яркын келпетлери.
Бу куьн «Согыс. Енъуьв. Эс» деп аталган китаплер выставкасы да уйгынланган эди.
Йолыгыс бек аьруьв оьтти. Муса Отаровтынъ кызы Ирина айтканлай, мундай йолыгыслар яслардынъ эслеринде калып, каерде болса да, пайдасын береек.
Г.Сагиндикова.
Суьвретлерде: йолыгыс оьткен шакта.
