«Яздынъ куьни – йылды ток саклар» деген атайларымыздан калган акыллы соьзлер бар. Сол соьзлер яз куьнинде кырда кыйын салган эгиншидинъ йыл узагында берекети болар деген маьнеди анълатады.

Буьгуьнлерде Ногай районынынъ эгин кырларында люцерна биринши кере шалынып, сонынъ пишени аьзирленип туры. Баьриси аьлиги заманга район бойынша 310 тонна люцерна шалынган.

Муннан алдын быйылгы язлык кыр куллыкларынынъ сырагысында районнынъ эгинши-фермер эм байыр ярдамшы хозяйстволары эгин кырларда бир неше язлык культураларын да шаштылар. Айтпага, район бойынша оьткен язлык айларында арпа 3200 гектар, сулы 450 гектар, быйыл шашылган коьпйыллык оьленлери (люцерна) 1200 гектар, алдынгы йыллардынъ коьпйыллык оьленлери 3700 гектар, бакша культуралары 2990 гектар майданларды бийлеген деп билдиреди Ногай район администрациясынынъ авыл хозяйство управлениесининъ агрономы Душанбек Аманиязов.

Карагас авылында Назира Нукова басшылайтаган «Назира» эгинши-фермер хозяйствосы быйыл да ералма оьстируьв мен аьрекетин бардырады. Ол оьз ерлеринде 145 гектарда ералма оьстиреди.

Район бойынша байыр ярдамшы хозяйстволар аьрекети мен 311 гектар ерлерде солай ок ясылша культуралары да шашылган.

Соны ман бирге оьткен йыл район бойынша куьзлик бийдайы баьриси 9020 гектар эгин кырларда шашылган эди. Сол оьсип турган аслыкты йыюв куллыклары басланмага эндиги коьп заман калмаган. Эгиншилер сога аьзирлик коьредилер.

Куьзликлер районда Уьйсалган, Орта-Тоьбе, Карагас, Куьнбатар, Нариман, Червленные Буруны, Сылув-Тоьбе авылларынынъ эгин майданларында оьседилер.

М.Юнусов.