Дагестан Правительствосынынъ Председатели Абдулмуслим Абдулмуслимов РФ Федераллык Йыйынынынъ Федераллык Советин Ногай шоьлин сув ман канагатлав маьселесин шешуьвге кириспеге тилек салды.
Киши предпринимательство тармагынынъ партнерларынынъ Биринши федераллык конференциясынынъ «Малому бизнесу – большую полку» деп аталып, Санкт-Петербург каласында оьткен йолыгысында Дагестаннынъ премьер-министри Абдулмуслим Абдулмуслимов эм Федерация Советининъ председателининъ биринши орынбасары Андрей Яцкин Ногай шоьлининъ эм Тарумов районынынъ ерлерин сув ман канагатлав маьселеди эм соны ман байланыста авыл хозяйстволык продукциясын оьстирип болмайтаганын ортага салып ойластылар.
– Бас деп онда бек аьруьв оьседи бахша культуралар – карбызлар эм кавынлар, солай ок помидор эм огурце. Россия Авыл хозяйство министерствосы Дагестан Правительствосы алдында сол майданды оьстируьв бойынша борыш салады, тек оны биз шешип болаякпыз, эгер сув ман канагатлав соравды шешсек. Бизде, солай ок грузин ерлер деп аталган, совет заманында бизим республикадан арендага алынган 250 гектардан артык ерлер бар. Бу ерлер сувсызлыктан курыганлар. Ондай маьселе орын табады тек Дагестанда тувыл, кургаклык Ставрополь крайынынъ сырт кесегин эм Калмыкия Республикасынынъ кубыла бетин бийлейди, – деди Абдулмуслим Абдулмуслимов.
А.Абдулмуслимовтынъ айтканын тынълап, Андрей Яцкин эм аграрлык-азык эм табиат пан пайдаланув бойынша Комитетининъ председатели Александр Двойных сув ман канагатлав ман байланыслы маьселеди шешуьвге коьмек этпеге аьзирлигин билдирдилер.
Сырт зонада сувгарылатаган ерлер тармагын оьрлендируьвге каратылган шаралар ишинде – сувгарув тармакларында (Сулу-Чубутла, Караногай магистраль каналы эм Ногай сув тракты, Терско-Кумский магистраль каналы) реконструкция ислерин юритуьв, янъы артезиан скважиналар казув эм с.б.
Йолыгыс барысында Абдулмуслим Абдулмуслимов сувгарылатаган ерлер негизинде Дагестаннынъ Сырт зонасында авыл хозяйство тармагынынъ келеектегиси акында толысынша хабарлады.
Эки як та бу соравлар ювык арада, сол тармак пан байланыслы федераллык министерстволарды эм ведомстволарды шакырып, Федерация Советининъ майданында ортага салып ойласпага токтастылар. Оннан баска болып, Совет Федерация делегациясы региондагы аьлди билуьв ниетте Дагестанга келмеге планлайды.
