Дагестан Аькимбасынынъ кесек заманга куллыгын юритуьвши Сергей Меликов янъыларда «Диалог» АНО ваькиллери мен йолыгыскан.

Бу интернет-коммуникациялар эм власть пен ямагат арасында хабарласув тармагындагы компетенцияларынынъ россиялык ведомстволар ара орталыгы болады. Сол ок «Диалог» АНО организациясынынъ бир структурасы Россия Президенти Владимир Путиннинъ элдинъ баьри субъектлеринде де регионлар ман етекшилев орталыкларын туьзуьв бойынша берген тапшырувын яшавга шыгарган. Сол орталыклар регион яшавынынъ туьрли тармакларыннан келетаган яшавшылардынъ шагынувларын тергевдинъ ортак бир пунктлары боладылар. Оннан баскалай, Регион ман етекшилев управлениеси (ЦУР) оьзине туьсетаган билдируьвлер негизинде республикада туьзилген аьллерди билдиретаган аналитикалык материлларын эм регионды армаган оьрлендируьв бойынша ой-кенъеслерди аьзирлейди. Управление йыйылган маьселелерге регионаллык властьлерининъ эс беруьвин тезлетеди, солай ок тергевлер эм мониторинг юритуьв аркасы ман келеекте сондай маьселелердинъ тувувынынъ алдын шалады.
Йолыгысты баслай келип, Сергей Меликов Управлениединъ куллыгынынъ хайырын арттырув керегин, бу структурадынъ маьнелигин белгиледи. Соны ман бирге республика етекшиси Управлениединъ исининъ кеплери эм йорыклары регионнынъ баскалыгын, сонда яшайтаганлардынъ менталитетин эм субъекттинъ географиялык орынласувын эсапка алмага тарыгын белгиледи.
Йолыгыстынъ тамамында, Сергей Меликов июль айдан баслап Регион ман етекшилев управлениеси Дагестан еринде информацияды йыюв, асыллав, тергев эм республика етекшилерине тийисли карарлар кабыл этуьв уьшин сондай информацияды беруьв орталыгы кебинде ислемеге тарыгын билдирген.