Тап Леонид Гайдай салган комедиясындагындай бизим Карина Зарманбетова. Мен Каринады биринши кере Ортак патшалык сынавларын оьткен шакларда коьргенмен. Караганда терен билимли, оьз ойларын яклап болатаган кыз болып коьринеди. Онынъ акында мектеб йылларында да аз эситпегенмен. Каринадынъ аты коьплеген район, республикалык кезеклеринде оьтетаган шараларда енъуьвши болды деп аз айтылмайтаган эди.
Карина Зарманбетова эки йыл артта Карагас авыл орта мектебин алтын медали мен кызыл аттестатка битирген. Сол заманда онынъ алдында бир неше йогары окув ошагына йоллар ашык эди, тек Карина Саратов каласындагы патшалык юридическая академиясын сайлады. Буьгуьнлерде ол Юстиция институтынынъ гражданско-правовой профили бойынша факультетининъ 2-нши курсынынъ студенти болады. Карина бу окув ошагында окыйтаган эки йылы ишинде оьзин тек терен билимли, окувга аваслыгы бар этип коьрсетип келеди. Аьр бир сынавды йогары дережеде оьтеди. Оьзи тап мектеб йылларындагындай болып, спорт пан аьвлигуьвин де тасламайды. Ол мектеб йылларында, окытувшысы Радмир Джумандыковтынъ етекшилеви астында волейбол ман аьвлигетаган эм сол ойынды ийги ойнайтаганлар санына да киретаган эди. Аьли де ол Саратовтагы патшалык юридический окув ошагынынъ йыйылма волейбол куьбине киреди эм ийги сырагыларды да коьрсетип келеди.
Карина мектебке келгенлей ок оьзининъ терен билимлигин, аьр кайсы яктан да кызыксынувы барын коьрсеткен кыз эди. Онынъ акында соьйтип биринши окытувшысы Марзиет Исмаиловна Аблезова айтатаган болган.
Карина мектеб йылларында Дагестан Республикасында озгарылатаган «Умники и умницы» телевизионлы ойынында да катнаскан эм сонынъ тогыз орденининъ иеси де болган.
– Мен буьгуьнлерде сондай аьллерге етискенимде окытувшыларым Б.Абдуловадынъ, А.Самединовадынъ, Ф.Кидирния- зовадынъ, А.Аджигельдиевадынъ, Н.Шураевадынъ уьйкен уьлиси бар деп ойлайман. Олар бизим терен билимли болувымызга аз куьшлерин салмаганлар. Ак юрегимнен окытувшыларыма разылыгымды билдиремен эм аьли де оларга терен билимли, разылык айтып болган окувшыларды йорайман, – дейди Карина.
– Карина бизим акыллы окувшыларымыздынъ бириси эди. Биз сондай окувшыларымызга уьйкен сенимлер этемиз, олар бизим келеектегимиз. Карина Ортак патшалык сынавларды йогары дережеде оьткенлердинъ бириси, ол тарих сабагыннан сынавларда 94 балл алган эди. Буьгуьнлерге дейим ол алган баллдан коьп, бизде алган аьдем йок, – дейди Карагас авыл орта мектебининъ етекшиси Насипхан Багудин кызы Шураева.
Мине сондай бизим Карина. Оьзи куллыксуьер, алдына салган ой-ниетлерине етисип болган, яратувшылыклы ислеп болатаган аьдем. Аьли уьшин Каринадынъ бас мырады – йогары белгилерге йогарыда белгиленген окув ошагын битирип, сайлаган кесписининъ алдышы специалисти болув.
Янъыларда биз студентлер куьнин белгиледик. Сол куьнде мен Каринага ак юрегимнен тек ийгиликлерди, аьлиги заманда озып турган сессиясын тек бес белгилерге бергенди йорайман.
Г.Сагиндикова.
Суьвретте: К.Зарманбетова
