Окытувшы. Аьр бир аьдем оны ман таныс. Окытувшы мектебке янъы келген балады билимлендируьв дуныясына алып барады. Шынты окытувшы балаларды, оьзининъ сайлаган кесписин терен суьюви мен баскаланады эм айырымланады. Ол коьп заманлар узагында баскаларга коьрим де болып келген.
Ногай районымыздынъ Калинин авылынынъ Суюн Капаев атындагы мектеби де оьз куллыкшылары ман оьктемсийди, сол мектебтинъ оьрленуьв, оьсуьв йолында билимлендируьвге оьз яшавларын багыслап келген, тийисли несилди тербиялавга аз куьшлерин салмаган окытувшылар болганлар эм бар. Сондай терен билимли, оьзининъ сайлаган кесписине алаллыгы ман баскаланатаган окытувшы, мектебимиздинъ аьлиги етекшиси Эльмира Айнадин кызы Аджекова болады.
Эльмира Айнадин кызы 1976-ншы йылдынъ увыт айынынъ 21-нши куьнинде Терекли-Мектеб авылында тувган. Ол оьз тенълери мен бирге ерли мектебке де барды эм соны 1993-нши йыл уьстинликли де битирди. Мектебтен сонъ ол Дагестан Республикасынынъ бас каласы Махачкаладагы педагогикалык окув ошагынынъ тарих факультетине окымага туьседи. Окув йылларыннан сонъ, ол оьзининъ ис аьрекетин тувган-оьскен авылында баслайды. Сол йылларда ол Сафарбий Аджеков пан танысады эм яслар араларында суьйим сезимлери тувады, Ногай районымызда тагы да бир наьсипли аьел курылады. Буьгуьнлерде сол аьелде доьрт бала тербияланадылар. Аьли уьшин Сафарбий мен Эльмирадынъ уьйкенлери – Эльзара ман Айза да оьзлерининъ аьеллерин курганлар. Олар оьзлерининъ атасы ман анасына аьли конак болып келедилер. Уьшинши аьвлетлери Аиша эм ялгыз увылы Азамат мектеб окувшылары боладылар.
Эльмира Айнадин кызы оьз ериндеги аьдем. Ондай аьдемлерге карап айтылган болар: «Ис орын аьдемди ярасыкламайды, аьдем ис орынды ярасыклайды», – деп. Ол окыткан эм аьли де окытатаган окувшылар коьп шараларда катнасадылар. Сол окувшылар оьзлерининъ терен билимлерин баслап район, сонъ республикалык кезегинде оьтетаган ярысларда коьрсетедилер. Ол оьзининъ окувшылары ман ногай миллетининъ тарихин терен уьйренмеге шалысады. Коьбиси язатаган куллыклары да сол темага багысланган боладылар. Оьзи де тарих сабагы бойынша окытувшылардынъ республикалык конференциясында да катнаскан.
Эльмира Айнадин кызы Аджекова куьн сайын оьзининъ билимин оьстируьв уьстинде аьрекетин бардырады. Буьгуьнлерге онынъ етимислери аз тувыл. Ол «Россиядынъ энъ ийги окытувшысы» деген атты казанып, РФ Президентининъ Грантына да тийисли болган. Ол ис аьрекетин ийги бардыратаганына ога берилетаган Сый грамоталар айтадылар. Ис йолдасларымыз арасында да сый-оьрмети бар окытувшы. Ол аьр аьдемди анълап болады, биз бир-биримиз бен кайгымызды да, куванышымызды да боьлемиз.
Янъыларда окытувшыдынъ кеспи куьни белгиленди, сол куьнди де бизим ис коллективимиз бирге йолыкты. Сол куьн окытувшылар ийгилик, якшылык йорап, ис аьрекетимиз оьз пайдасын тийдирип турсын деген йоравлар эттилер.
С.Янгазиева,
С.Капаев атындагы орта мектебининъ окытувшысы.
Суьвретте: Э.Аджекова.
