Ногай районынынъ Червленные Буруны авыл яшавшысы Мурат Сариевке былтыр 25-нши сентябрьде мобилизацияга шакырув акында кагыт бергенде, ол соны шынты гражданиннинъ эм эр аьдемнинъ борышы деп дурыс анълады. Бирден адалаган эм мунъайган анасынынъ коьзлерине тувра карап: «Йок, анам, шакырган сонъ барув керек, буьгуьн эндигиси Тувган Элди коршаламага бизим заман келген болар», – деди.
Мураттынъ анасы Боранбийкединъ соьзлерине коьре, оны оьзиндей мобилизацияга шакыртылганлар ман бирге баслапкы куьнлерде ок СВО юритилип турган ерге йибергенлер. Ога Запорож областининъ Гуляйполе деген каласында гранатометчик болып согыспага туьсти. Мунда ол аьли 3 айдан артык заман оьзининъ аьскерши йолдаслары ман бирге бу яктагы бизим межеди украин армиясынынъ урувларыннан коршалаган. Мен «коршалаган» деп язувымнынъ маьнеси сол, неге десе быйылдынъ январь айынынъ басында Мурат яраланып госпитальге туьскен.
– 6-ншы январьде, биз, кедемиздинъ яраланганы акында эситип, сонда ок та Ростов каласына йолландык, – деп хабарлайды онынъ анасы. – Бизге увылымызды коьрмеге ыхтыяр бердилер. Мунда биз Муратты тезден Ставропольге йибереегин билдик. Солай да болды. Буьгуьнлерде ол Ставрополь каласында эмленеди.
… Мурат койшы аьелде тувганга болар, кишкей заманыннан алып кыйынлыкларга уьйренген эди. Онынъ ата-анасы 11 йыл 2-нши фермада койшы болып ислегенлер. Мурат бала шактан авыр аьллерден ийменмей, соларды енъмеге оьзинде куьш тавып уьйренген. Ол зат сонъында ога аьскер сырасында болганда да, сонъ мобилизация заманында да коьп ягыннан берк тирев болды.
Мурат Сариев 2010-2012-нши йылларда Карелиядагы ПВО аьскерлеринде оьзининъ эр борышын толтырган. Мунда, сырт якларда, кыс айлары каты боладылар. Бир куьн ол анъсыздан сырт яклары онынъ ден савлыгына келисли тувыл экенин сезген. Болса да, ол биревге де шагынмай, эки йыл аьскер борышын энъ ызгы куьнине дейим мунда толтырды. Бу зат Мураттынъ касиетинде эрлик бар экенин аян шайытлайды.
Армиядан сонъ ол туьрли куллыкларда ислеген. Мобилизацияга шакыртылганнан бери яраланганша ол оьз авылдасы Тимур Сабутов пан бир окопта согыскан.
Бизим аьли уьшин М.Сариевтинъ Россия аьскерлери украин нацистлерине карсы юритип турган специальли согыс операциясында катнасувы акында билгенимиз мине сол. Ол согыста яраланып, оьзининъ тоьккен каны ман Аталыгымыздынъ шынты коршалавшысы, оьз халкынынъ эр йигити экенин баьрине де коьрсетти.
Буьгуьн уьшин биз бу йигерли эм берк янлы аьскершиге тез арада эмленип сав болганын эм оьзининъ тувган уьйине, оны шыдамсыз куьтип турган ювык аьдемлерине, аман-эсен кайтып келгенин йораймыз.
М.Ханов.
Суьвретте: М.Сариев.
