«Баьри кеспилер аьдемлерден, тек уьшеви Кудайдан: окытувшы, тоьреши эм врач», – деп айткан Сократ. Дуныядагы бу сыйлы кеспилерди Кудай язып, байырлаган аьдемлер сайлаган йолыннан таймай, оьмир бойы сол исти янын берип, йогары дережеде толтырадылар. Карагас авылындагы участок больницасынынъ бас врачы Назира Елболдиева медицина исине савлай яшавын багыслап келеди демеге болады.

Онынъ юрегинде бу ак ниетли кеспиге суьйим эртеректен тувган. Аьптеси Ногай районынынъ уста врачларынынъ бириси Гульфира Теминдарова (яткан ери еннетли болсын) яс кызга коьрим болган, абасы медицина институтында окыган йыллар ол да ак халатлылардынъ кесписи акында мырат эткен. Назира Елболдиева Червленные Буруны авылынынъ орта мектебин окып кутарып, Дагестан патшалык медицина институтынынъ педиатрический факультетинде окып баслайды. Сол йыл бу окув ошагында педиатрический факультет янъы ашылган болган. Назира Елболдиева ман бирге Ногай районыннан эки кыз Азия Буланбаева эм Зейнаб Балигишиева окыганлар. Назира Искаковна интернатурады Нальчик каласында оьтип, ис аьрекетин 1976-ншы йыл «Ногай ЦРБ-да» баслаган.

Сол йыллар больницада ислемеге тыныш болмаган. Врачлар аз болганнан себепли, Назира Елболдиевага бир кесек заманга ялгыз оьзине больницада эм поликлиникада балаларды карамага туьскен. Больницадынъ бас врачы Расиль Заргишиев болган. Назира Искаковна яс болса да, оьзин йигерли этип коьрсетеди эм 1980-нши йыл ол Карагас авылындагы участковый больницадынъ бас врачы этилинип беркитиледи. Сол сенимди аклар ниетте, яс врач баьри куьшин салып шалысады. Бу больницада Орта-Тоьбе, Уьйсалган, Карагас, Бораншы авылларынынъ авырыганлары каралган. Оннан баска, больница 45 кошарды да канагатлаган. Коьп бетинде бараяк ерине аьдемлер коьликлер мен тез арада тувыл, яяв еткенлер. Карлы, сувык кыстынъ куьнлеринде эм кешелеринде Назира Искаковна сол авылларга эм кошарларга барып, медицина яктан оьз коьмегин аьдемлерге эткен. Неше кере де ога авырыганды оьлимнен куткармага туьскен.
– Кыстынъ бир кешесинде мотоцикл мен бир эр киси келип, хатыны бек осал аьлде экенин билдирди. Мен акушерка ман бирге мотоциклге олтырып кошарга кеттим. Келсек, савлай азбар аьдемлерге толган. Йолдасымнынъ кыйналганыннан, коьзяслары тыгырдылар. Кене де хатын эм онынъ янъы тувган баласы аман экен, ама кыскаяклы бек осал аьлде, коьп кан йойыткан. Биз онынъ кан-тамырына дарманлар йиберип, бир неше саьат касында турып, аман калдырдык, кишкей колай болганда, Карагас больницасына аькеттик. Сондай неше оьзгерис те болган. Мутып та каласынъ, тек разы болган аьдемлер мутпайдылар, неше йыл оьтсе де, янасып, савбол айтадылар. Инсульт урганларга, яраланганларга да тезлик эм керекли ярдам эткенмиз. Санитарлар да бизим чемоданды алып, касымызда дайым юретаган эдилер. Оларга да айырым разылык. Сол йыллар балалар коьп туватаган эди, сога коьре кишкейлери авырыганлар да, кешелерде уьйлерине врачты шакырганлар да айлак коьп болатаган эди, – деп эсине алады сулыплы врач.
Назира Елболдиева етекши эсабында больницадынъ маьселелерин шешпеге дайым шалыскан. Ол ислеген баслапкы йыллар больницада коьлик болмаган. Сол себептен врач кыскаяклы савлык саклав министри Ибрагим Ибрагимовка (яткан ери ярык болсын) барып, оьзи ислеген больницага коьлик керегин билдирген. Министр врач кыскаяклыдынъ тилегин толтырады эм тез арада Назира Искаковна Карагас авыл участок больницасына УАЗ коьлигин аькетеди. Сол коьлик заьлим заман кулланылып, авырыганларга тез арада етпеге амал берди. Соьйтип, бир неше йылдан больницага тагы да коьлик керекти. Кайратлы кыскаяклы тагы да баска савлык саклав министри Ильяс Мамаевке бир неше кере хат та язып, янъы коьлик больницага алган. Солай ок 2013-нши йыл Назира Елболдиева етекшилеген больницада капиталлык ярастырув этилген, янъы муьлк те аькелинген. Алдын 10 койка болган болса, тагы да 5 койка косылып, саны 15-ке еткерилген. Аьли болса, Карагас авыл участок больницасында «тезлик ярдамынынъ» пункты аьрекетлейди. Бу куьнлерде мунда Интернет тартылган, врачлар компьютер мен ислейдилер, авырыганлардынъ электронный карталарына язувлар этилинеди, ислемеге ийги амаллар туьзилген. Алдынгыдай болып, ялгыз бир врач тувыл, терапевт, акушер, педиатр эм стоматолог куллык этедилер. Назира Искаковна болса, терапевт куллыгын юритеди. Ол ис йолдаслары, авыл яшавшылары арасында сый-абырай казанган. Медицина яктан коьмеги тийгенлер Назира Елболдиевады билимли, уста врач, медицина тармагында ислемеге, аьдемлердинъ савлыгын сакламага эм оьмирин узак этер уьшин тувган деп, сыйлап айтадылар.
Ийги иси уьшин Н.Елболдиева бир неше Сый грамота ман савгаланган, ол 2004-нши йыл Дагестан Республикасынынъ ат казанган врачы болды. Солай ок йогары категориялы врач Ногай район Депутатлар Йыйынынынъ депутаты болып та сайланган.
Назира Искаковна ян йолдасы Рашид Алиевич пен (яткан ери еннетли болсын) эки увыл ман бир ярасык кыз оьстирген. Увыллары Ставропольдагы патшалык университетининъ юридический факультетинде окыганлар, аьли Москва каласында бизнес юритедилер. Айгуль республикалык поликлиникада психолог болып ислейди. Сыйлы ясуьйкеннинъ яшавына куьезди 6 уныгы косады.
Янъыларда Назира Елболдиева 70 йыллык мерекесин белгиледи. Биз сыйлы врачка ден савлык эм аьли де коьп йыллар эмлеген аьдемлерди оьзининъ усталыгы эм кеспилик етимислери мен суьйиндиргенин йораймыз.
Н.Кожаева.
Суьвретте: Н.Елболдиева (ортада) ис йолдаслары ман.