Биюв – поэма, онда аьр бир силтев – соьз. Соьйтип айткан сол саният акында акыллы аьдемлердинъ бириси. Ким сукланмайды ярасыклы биюв мен? Бийип болатаган аьдемлерге кайзаманда да коьзим кызып каламан. Биюв – инсаннынъ янынынъ оьрге ымтылувы, оьзлерининъ сезимин колынынъ, аягынынъ силтеви мен коьрсетуьви. Боьтен де, сахнага балалар шыгып бийисе, юрек куванышка толады. Соьйтип, белгили хореограф Альмира Тунгатарова етекшилейтаган балалар биюв ансамбли «Карлыгашлар» оьз оьнери мен баьрисин де сукландырадылар. Янъыларда олар Туьрк элининъ Ялова каласына биюв фестивалине барып келдилер.
– Фестивальде катнаспага оьз аваслыгымыз бан бардык. Сырт Осетиядан танысым Лидия Камал кызы Мусукова бизге Ялова фестивалине бармага коьмек этти. Мермер тенъиздинъ касында орынласкан амфитеатрда фестивальдинъ ашылувы болды. Ататуьрк паркында балалар суьвретке туьстилер, кала орамлары ман катнасувшылар Дагестан эм ногай халкынынъ байрагын алып юрдилер. Грузия, Осетия, Азербайджан эм баска эллерден де биюв ансамбльлер бар эди, – деп хабарлайды Альмира Ораш кызы.
Туьрк элинде яшайтаган ердеслеримиз Дагестан байрагын коьрип, яс биювшилерди янасып, хош алдылар. Энъ де кишкей катнасувшы 6 ясында эди, энъ де уьйкени – 14 ясында. Балаларга бек ярады Туркия элинде. Фестивальде бизим кишкей «Карлыгашлар» «Катыркыз» эм «Ногай кийгиз» биювлерин бийидилер. Кайдай йылы карсы алдылар оларды каравшылар, ногай кийгизин коьргенде, баьриси де турып, карс кактылар.
Бизим халкымыздынъ делегациясы Ялова каласынынъ мэри Муаммер Эрол, губернатор Вефа Салман ман коьристилер, оларга ногай халкы атыннан савгалар тапшырдылар. Кала етекшилери ногай конакларды хош алдылар, ногайлардынъ маданияты, санияты ман кызыксынатаганын ашык кепте айттылар.
– Сизинъ биювлеринъиз бизге таныс эм ювык. Сол биювлерде – савлай ногай халкы, сизди аьли де куьтемиз конаксуьер Туьрк еринде, – деди губернатор. Балалар баска элдинъ балалары ман таныстылар, боьтен де туьрк балалар ман тар байланыстылар, олар ман бирге туьрк биювлер де бийидилер. Баска эл, баска тил, баска ят ер, болса да онда бизим биювшилерди йылувлык пан хош алганы аьвлетлеримиздинъ эсинде дайымларга калаяк.
Альмира Ораш кызы Тунгатарова ата-аналарга ога аьвлетлерин сенгенге, оны коьтергишлегенине, Ногай район администрациясына балаларды Пятигорск каласына дейим бармага коьлик бергенине оьз разылыгын билдиреди. Кишкей «Карлыгашларымызга» аьли де коьп сондай фестивальлерде, конкурсларда катнасып, баргылы орынлар алганын сагынамыз.
Г.Бекмуратова.
Суьвретте: «Карлыгашлар» ансамбли Ялова каласында.
