Караша айынынъ ызгы куьнлеринде Дагестан Республикасынынъ Ногай районында балалар яратувшылык фестивали оьтти. Туьрли регионлардан келген балалар коллективлери оьз оьнерлерин коьрсеттилер, оьз тенълери мен таныстылар, район орталыгында орынласкан патшалык яратувшылык коллективлерининъ мастер-классларында болдылар. Балалар баргылар, дипломлар алып, суьйинип кайттылар. Сондай шаралар бек керекли деп ойлайман, саьбийлер баска балалар ман расып, олардынъ оьнерлигиннен де оьзлерине пайдалы затлар аладылар. Сол куьн бир нешевлер арасында дослык сезими тувып, сол сезип йыллар ман беркленер деп сенемиз.
Оьз коллективлери акында яратувшылык балалар куьплерининъ етекшилери хабарладылар.
Улангерек Аджибатырова, Шешен Республикасыннан миллет ногай орталыгынынъ балалар хореографиялык «Ушкын» ансамблининъ етекшиси.
– Биз бек суьйинемиз сондай уьйкен шарада катнасып турганымызга. «Ушкын» ансамбли Шешен Республикасы бойынша эм баска ерлерде туьрли шараларда катнасады, янъыларда биз Карашай-Шеркеш Республикасында болдык. Аьдетинше анасамбльдинъ репертуарында биювлер, болса да фольклор коьрсетуьвлер де саламыз. Фестиваль – баьримизге де бек маьнели шара. Бизге оьз оьнеримизди коьрсетип, баскаларды да карамага амалымыз бар. Сондай шаралар яратувшылык коллективлерге бек керекли. Бу фестиваль аьдетке кирер деп сенемиз, неге десе балалар арасында дослык эм катнасув болмага керек, – деди балалар ансамблининъ етекшиси.
Аида Мухаметова, Новкус –Артезиан авыл маданият уьйининъ «Айданак» вокал куьбининъ етекшиси.
– Мен етекшилейтаган кружок 2021-нши йылда ашылган. Балалар суьйип келедилер кружокка. Биз ногай тилин уьйренемиз, йырлар йырлаймыз, ногай халкымыздынъ маданияты акында билдируьвлер окыймыз. Фестивальде турли ерлерден балалар катнасаяк, сондай шарада катнасканымыз бизге бек суьйинишли. Бу шара – бизим арамызда, балалар арасында коьпир. Ногай патшалык оркестринде мастер-класста болдык, бизге бек ярады. Балалар ногай маданияты ман таныстылар, оркестр кайтип ойнайтаганын коьрдилер. Бу куьн балалардынъ эсинде дайымларга калар, сондай шаралар коьп озгарылсын, – деди Аида Равиль кызы.
Астрахань областиннен келген оьнерли балалар делегациясын Линара Иргалиева етекшилеген. Ол коьплеген йыллар ногай тарихи, маданияты ман каьрлейди.
– Бизим делегациямыздынъ аты – «Аштархан». Бу каламыздынъ Астрахан ханлыгы болган замандагы аты. Фестивальде «Эдиге» яслар орталыгы атыннан 5 катнасувшылар келдилер: Богдан Петров, Эльдар Толубаев, Аиша Альмухамедова, Эмирлан Янчуев, Рушания Нурмухамедова. Балалар бурынгы йырлар йырладылар, биювлер бийидилер, домбырада ойнадылар. Оьнерли балаларымыз коьп, олар оьнери мен, куванышы ман баскалар ман боьлистилер. Олар баска регионларда яшайтаган ногайлар ман таныстылар, олардынъ маданиятын, яшав аьлин коьрдилер. Сондай ийги фестиваль озды Ногай районында, Терекли-Мектеб оьз еринде оьнерли балаларды йыйнады. Аьли де коьп фестивальлер болсын деп сагынамыз, – деди Линара Иргалиева.
Келеекте сондай шаралар коьп болсын, сол заман маданиятымыз да оьрленер.
Бизим хабаршы
Суьвретте: М.Казаков.
