Аьр окув йылдынъ ызына ювыклап келуьви мен биз оьз аьрекетимиздинъ тамамларын келтиремиз. Оьткен йыллар ман тенълестируьвлер де боладылар. Сав окув йыл ишинде выпускной класслардынъ окувшылары ман куллык юритиледи, олар йыл узагында алдыларындагы Патшалык тамамлав аттестациясына эм Ортак патшалык сынавларга аьзирлик коьредилер. Соны ман байланыслы болып, 2021-нши йылдынъ тамамларына коьре, 2022-нши йылда Патшалык тамамлав аттестациясын уйгынлав эм сонынъ озгарылувынынъ йол картасы туьзилген.
Орталык патшалык сынавлардынъ тамамларын тергей келип, йылдан-йылга аьр бир окув сабагы бойынша орта тест балл оьсе береди. 2021-нши йыл, туьрли окув сабаклар бойынша ЕГЭ-ди 80-нен артык баллга берген окувшылар саны да оьскен. Эгер 2019-ншы йылда, йогары баллар казанган окувшылар саны отызга да етпейтаган болган болса, 2021-нши йыл олар эллиге ювык эди.
2022-нши йылда Россия Федерациясында йогары окув ошагына туьспеге ниети бар, ниети йок выпускник те Орталык патшалык сынавларды оьтеек. Тек йогары окув ошагына туьсеек выпускник (эки – орыс тил эм эсап окув сабаклары бойынша) тийислиден артык ЕГЭ береди (тагы да экев, оьзининъ сайлавына коьре).
Бу йыл болса, Орталык патшалык сынавларды беруьвге киритилген янъылык бар, олай дегенимиз, оьткен йылларда бизге сынавлардынъ ис борышлары аькелинетаган болган болса, бу йыл тек Интернет аркалы, бир белгиленген заманга келеек. Сонынъ уьшин сынавлар берилетаган пунктта ис аьрекетин бардыраяк окытувшылар янъы технологияларды аьруьв билмеге кереклер. Йыл сайын Ортак патшалык сынавларды озгаратаган окытувшылар тийисли йорыкларды оьтедилер. Ортак патшалык сынавлар оьтетаган пункттынъ етекшиси, ол йок болгандай болса, онынъ орынына ислеек аьдем эм технический специалистлер баьриси де Билдируьвлерди сайгаластыратаган республикалык орталыгында аттестация оьткенлер. Солай ок, ЕГЭ-де ортакшылык этеек окытувшылар да Федераллык тестирование орталыгынынъ сайтында дистанционлы окыйдылар эм аьзирлиги акында сертификат аладылар.
ЕГЭ-де технический специалистлердинъ ис аьрекетин информатика сабагыннан окытувшылар толтырадылар, уйгынлавшылардынъ куллыгын баслангыш эм туьрли окув сабаклардынъ окытувшылары бардырадылар. Ногай районымыз бойынша ЕГЭ-де эм ОГЭ-де 60-ка ювык окытувшылар катнасадылар.
Аьлиги заманларда Дагестан Республикасынынъ илми эм билимлендируьв министерствосы ман Ортак патшалык сынавлар оьткерилеек пунктларга тийисли технологиялык алатлар алынганлар. Ногай районында Ортак патшалык сынавлар оьтетаган пунктынынъ етекшиси К.Ярикбаева Ногай районынынъ администрациясынынъ финансовый боьлигине технический алат-яракларды алмага деп 206 мынъ маьнет акша керегин билдирген аьризесин берген.
Бу йыл районымыз бойынша баьриси 107 бала 11-нши классты битиреди, солардынъ 105-си Ортак патшалык сынавларды оьтееклер, калганлары – биреви тек справка алаяк, экиншиси ГВЭ кебинде ГИА береек. Биз баьри куьшимизди де балалар сынавларды ийги оьткенине саламыз.
Ногай районынынъ билимлендируьв боьлиги баска организациялар ман да тар байланыс тутады. Орталык патшалык болсын, Патшалык тамамлав аттестациясы болсын, ювыклап келгенде, солардынъ озаяк куьни белгили болган хатлар Ногай РЭС-ке, Ногай районы бойынша Россия МВД боьлигине эм Орталык больницасына йибериледи. Солардынъ аьр бириси де сынавларда ортакшылык этпеге кереклер, айтпага, Ногай РЭС электроярык пан, ОМВД – кавыфсызлык пан, Орталык больница – савлык саклав ягыннан канагатламага кереклер.
А.Агаспарова,
«Ногайский район» МР администрациясынынъ билимлендируьв боьлигининъ етекшиси.
