Совет йылларыннан токтаскан аьдетке коьре, биз сав элимиз бен аьр йыл сайын октябрь айынынъ экинши каты куьнинде авыл хозяйство куллыкшылар куьнин белгилеймиз.

Авыл хозяйство куллыгы ман биз аьли бала заманымыздан таныс. Ким, авыл еринде яшап бир кере сама койлар яде козылар, бузавлар, сыйырлар бакпаган, язлыкта койшыларда сакмалда ислемеген, май айында кырларда мол оьсетеган табиат пишенин колына шалгы алып шалмаган, язда совхоз кырларындагы пишенди, бакшаларда карбыз-кавынды, куьзде аьжибийдайды йыйыспага коьмекке бармаган?.. (Мектебте окыган йылларымызда классымыз бан авыл ерине аьжибийдай йыйнамага барганымыз туьнегуьндей эсимизде). Аьр биримизге кишкей заманымыздан сондай да ювык ислер. Сол себептен Авыл хозяйство куллыкшыларынынъ ис байрамы – ол бизим баьримиздинъ де, авыл еринде тувып-оьскен эм яшайтаган аьдемлердинъ байрамы.
Авыл кыйыншылары кайсы заманларда да: патша, социализм яде аьлиги рынок катнасувлары шагында да элимизди оьтпек пен, эт пен, суьт пен, юмыртка ман, емис-ясылша ман канагатлап келгенлер. Оларсыз бизим яшавды яшав этип коьруьв кыйынлы, неге десе алдынгы йылларда «Оьтпек болса, йыр да болар» дегенлей, бизге куьн сайын тамак-азыклары керек. Соны ман байланыс- та баьри де авыл хозяйство куллыкшыларын келип турган байрамы ман кутлаймыз. Баьри авыл яшавшыларына, ерли фермерлерге, байыр ярдамшы хозяйстволарынынъ иелерине, арендаторларга ден савлыкты, исте коьтеринъки уьстинлик- лерди, илгери оьрленуьвди йораймыз!