Дагестаннынъ экологиялык проектлери РФ-нынъ Табиат ресурслары эм экология министерствосында хош коьрилди эм колтыкланды. Сол соравды ДР-нынъ Аькимбасы Сергей Меликов тармак министри Александр Козлов пан оьткен ис йолыгысында ойласылды.
Темалардынъ бириси – регионда каты коммуналлык калдыклар ман байланыста инфраструктурага ер участокларын белгилев эм туьзуьв.
Соны ман, А.Козловтынъ соьзине коьре, республика еринде сондай туьзилеек доьрт объектлер федераллык субсидиялар алув уьшин айырылып белгиленген.
Дагестан Аькимбасы С.Меликов сондай инфраструктура астына ер участоклар туьзилгенин эм быйыл соны ман байланыста курылыс исине кириспеге амал барын белгиледи.
– 2024-нши йылдынъ ызына дейим каты коммуналлык калдыклар ман байланыслы маьселеди толысынша шешпеге планлаймыз, – деди ол.
Йолыгыс барысында Терек йылгасын савландырув эм Ачиколь коьллер зонасын оьрлендируьв бойынша куллык та ортага салынып ойласылды.