2023-нши йыл – Расул Гамзатовтынъ йылы. Онынъ тувганлы 100 йыллык мерекеси сыйына йыл бойынша коьп байрам шаралар оьтеек. Сондай Указ астына июль айында РФ Президенти Владимир Путин кол баскан.

Тек республикамызда тувыл, савлай Россия элинде эм шет эллерде де аты кенъ белгили зейинли авар шаири, Дагестаннынъ халк шаири Расул Гамзатовтынъ сыйлы мерекесине багысланып яратувшылык кешликлер озгарылаяк, китаплер выставкалары уйгынланаяк, язувшылар эм шаирлер мен йолыгыслар оьтеек.
Адабиат тармагында Расул Гамзатов коьрнекли орынды тутады. Онынъ калеми астыннан шыккан асарлары ман тек тувган авар миллетли халкы белгили болып калмай, Россия элининъ баска халклары да бек таныс. Онынъ коьплеген дестанлары, сонетлери, ялынлы ятлавлары миллионлаган тиражлы китаплер болып дуныя ярыгына шыгарылган. Коьп ятлавларынынъ соьзлерине анъ язылып, йырларга айланганлар. Атлары белгили йыравлардынъ оьнери мен олар халктынъ суьйикли йырлары эсабында туьрли яратувшылык шараларында аьли де эситиледи.
Расул Гамзатов – Дагестан халкларынынъ суьйикли шаири. Савлай яшав оьмири бойынша ол сыйлы конак эсабында коьп йолыгысларда ортакшылык эткен. Ол бар ерде коьп аьдемлер болатаган эди.
Расул Гамзатовтынъ китаплери ногай тилине де коьширилген. Айтпага, онынъ асарларын халкымыздынъ айтылган язувшылары Суюн Капаев, Аскербий Киреев, Гамзат Аджигельдиев, Кадрия коьширгенлер. Ана тилимизге авар шаирининъ асарларын коьшируьв аьрекетинде мен де ортакшылык эткенмен. Расул Гамзатовтынъ «Бийик юлдызлар», «Сенинъ атынъ», «Меним Дагестаным», «Аналарды сакланъыз» деген эм баска китаплери савлай дуныяга белгили.
Анварбек Култаев,
Дагестаннынъ халк поэти.